Մի շտապեք ինձ + 1 անել ձեր ցուցակներում, մեր խմբակցությունը քվեարկելու է միաձայն. Սամվել Ֆարմանյանը՝ Արարատ Միրզոյանին
ԱԺ «Հայաստանի Հանրապետական կուսակցություն» խմբակցության պատգամավոր Սամվել Ֆարմանյանը ֆեյսբուքյան իր էջում պատասխանել է ԱԺ «Ելք» խմբակցության պատգամավոր Արարատ Միրզոյանին, ով Սամվել Ֆարմանյանի ֆեյսբուքյան մեկ այլ գրառմանն ի պատասխան, գրել էր, թե ողջունում է նրա պատրաստակամությունը՝ ՀՀԿ խմբակցությունում «խոսել Նիկոլ Փաշինյանին միաձայն վարչապետ ընտրելու օգտին՝ իբրև իրավիճակի միակ հնարավոր և պետության համար շահեկան հանգուցալուծում»։ Սամվել Ֆարմանյանը գրել է.
«Արարատ Միրզոյան ջան, ուսանողական իմ ընկե՛ր: Շնորհակալ եմ արագ արձագանքի համար:
Մի քանի կարևոր ճշգրտում: Մի շտապեք ինձ + 1 անել ձեր ցուցակներում: Կարծում եմ՝ ամեն ինչ հստակ եմ շարադրել: Մեր խմբակցությունը քվեարկելու է միաձայն: Ավելին՝ հակառակը Ձեր գլխացավն է լինելու: Պատմությունը՝ վկա: Հակառակը չի լինելու:
Ես ունեմ իմ տեսակետը վարչապետի թեկնածու Նիկոլ Փաշինյանի վերաբերյալ: Ունեմ իմ տեսակետը վարչապետի հնարավոր այլ թեկնածուների վերաբերյալ: Ասածս պարզ բան է՝ Նիկոլ Փաշինյանը պետք է գա իր գործընկերների հետ խոսելու. նստենք խոսենք, պետք է խոսենք առանց պաթոսի, խոսենք կարևոր հարցերի մասին, խոսենք միմյանց հասկանալու, խոսենք մտահոգությունները փարատելու նպատակով:
Հ.Գ. Հանդիպման համար սուրճ հաստատ կա»,– գրել է պատգամավորը:
Հետևեք մեզ Facebook-ում