Ոմն մարզպետ սպառնում է ԲՀԿ-ական գյուղապետերին. Ն. Զոհրաբյան

News.am-ը գրում է. ԲՀԿ խմբակցության ղեկավար Նաիրա Զոհրաբյանը պնդում է, որ մի մարզպետ սպառնացել է ԲՀԿ-ական գյուղապետերին:

«Արդեն իսկ որոշ պաշտոնյաների, մարզպետների մոտ ադրենալինի եւ վատ խոլեստերինի ամպլիտուդի լուրջ տատանումներ են նկատվում: Մարզպետներն անցել են սպառնալիքների` իրենց հոգեհարազատ ժանրին: Օրինակ, ոմն մարզպետ իր մոտ է հրավիրում ԲՀԿ-ական գյուղապետերին եւ սպառնում` հայտարարելով, որ մարզում «մառոզ» անողն ինքն է: Իհարկե, «մառոզի» լավագույն մասնագետը Գագիկ Սուրենյանն է, որի մոտ այդ մարզպետը կարող է հաստիքային գործի անցնել եւ կախված աշխատավարձի չափից` որոշեն` «մառոզ» է անում, ցունամի, թե ընդամենը քամի տատանում: Եթե տվյալ անձի եւ անձանց մոտ վստահության եւ հեղինակության կատարյալ երաշտ է, եւ սեփական հեղինակության բացակայությունը փորձում են կոմպենսացնել «մառոզներով» եւ եղանակային այլ տեղումներով, խոստանում եմ` շատ արագ մնալու են այդ «մառոզի» տակ»,- այս մասին այսօր` փետրվարի 7-ին, խորհրդարանում հայտարարեց Նաիրա Զոհրաբյանը:

Խմբակցության ղեկավարը հրաժարվեց որեւէ անուն տալ: