Համայնքներում եւս 45 նոր ծրագիր կիրականացվի

ՀՀ վարչապետի պաշտոնակատար Կարեն Կարապետյանի ղեկավարությամբ այսօր՝ ապրիլի 13-ին, տեղի է ունեցել սուբվենցիաներ ստանալու ծրագրային հայտերի գնահատման միջգերատեսչական հանձնաժողովի նիստը, որի ընթացքում քննարկվել է հանրապետության համայնքներից ստացված սուբվենցիայի ծրագրային 46 հայտ:

Կառավարությունից հայտնում են, որ Տարածքային կառավարման եւ զարգացման նախարարի պաշտոնակատար Դավիթ Լոքյանը տեղեկացրել է, որ 33 համայնքից ստացված 46 ծրագրային հայտի ընդհանուր գումարը 2 մլրդ 32 մլն դրամ է, որից համայնքների կողմից ֆինանսավորումը կազմում է 963,1 մլն դրամ, մասնավոր հատվածի ֆինանսավորումը՝ 177 մլն դրամ, իսկ պետբյուջեից տրամադրվող սուբվենցիայի ծավալը՝ 892 մլն դրամ: Ներկայացված 46 ծրագրից 23-ը ստացվել է խոշորացված 14 համայնքից:

Նախարարի պաշտոնակատարի ներկայացմամբ՝ այս եւ նախորդ նիստում ներկայացված եւ հաստատված 85 ծրագրային հայտի ընդհանուր գումարը կազմում է 3 մլրդ 387 մլն դրամ, որից՝ համայնքների կողմից համաֆինանսավորման չափը 1 մլրդ 738 մլն դրամ է, պետական բյուջեից տրամադրվող սուբվենցիայի ծավալը՝ 1 մլրդ 459 մլն դրամ, մասնավորի կողմից ֆինանսավորումը՝ 188,5 մլն դրամ: Նշված 85 ծրագրից 32-ը ներկայացվել է 18 խոշորացված համայնքի կողմից:

Համայնքային նշանակության ծրագրերը հիմնականում վերաբերում են ճանապարհների վերանորոգմանն ու բարեկարգմանը, ոռոգման եւ խմելու ջրագծերի, կոյուղագծերի վերանորոգմանն ու կառուցմանը, համայնքների լուսավորությանը, մանկապարտեզների եւ մշակույթի տների կառուցմանն ու վերանորոգմանը, գույքի, օրինակ՝ աղբատար մեքենաների ձեռքբերմանը եւ այլն:

Նշվել է, որ բոլոր նախագծերը փոխանցվել են շահագրգիռ գերատեսչություններին՝ նրանց կարծիքներն ու առաջարկներն ստանալու համար:

Միջգերատեսչական հանձնաժողովը քննարկումների արդյունքում 46 հայտերից չի հաստատել միայն մեկը՝ համայնքի կողմից ոչ բավարար համաֆինանսավորման պատճառով:

Անդրադառնալով ծրագրերի պատշաճ որակով ու արդյունավետությամբ իրականացմանը՝ Կարեն Կարապետյանը նշել է. «Այս տարվա վիճակագրությունն ու պատկերը թույլ կտա, որ խաղի կանոնները մյուս տարիների համար ավելի հստակ ձեւակերպվեն: Հրատապ եւ այլ ծրագրերով համայնքներին տրվող պետական միջոցները հատկացվելու են խիստ նպատակային: Եթե 3-4 տարի սուբվենցիաների այս ծրագիրը շարունակենք եւ իրականացնեք այնպես, ինչպես որ նախատեսում ենք, համայնքների վիճակը զգալի կերպով կփոխվի»:

Կարեւորվել է նաեւ ծրագրերի իրականացման նկատմամբ վերահսկողությունը՝ կապված շինարարության որակի եւ այլնի հետ: Կարեն Կարապետյանը պատասխանատու գերատեսչություններին հանձնարարել է աշխատել նաեւ մարզպետարանների թիմերի հետ: