«Լուսավոր» Մանե Թանդիլյանն ու Գևորգ Գորգիսյանը փաստացի իրենց համերաշխությունը հայտնեցին ՀՀԿ-ին՝ ընդդեմ Նիկոլի

Քիչ առաջ Ազգային ժողովում հետաքրքիր փաստ արձանագրվեց. «Քաղաքացիական պայմանագիր» կուսակցության անդամներ Արարատ Միրզոյանն ու Լենա Նազարյանը յուրօրինակ ֆեյերվերկ կազմակերպեցին Ազգային ժողովի ամբիոնի մոտ՝ հանրությանը կոչ անելով ակտիվորեն մասնակցել ապրիլի 13-ին Ազատության հրապարակում հանրահավաքին:

Հասկանալի է, որ ՀՀԿ- ականներին դա դուր չեկավ, որոնք հանդես եկան քննադատական ելույթներով: Իսկ Ազգային ժողովի նախագահ Արա Բաբլոյանը հատուկ ելույթով հանդես եկավ՝ նշելով, որ սույն քայլն անթույլատրելի է և նույնիսկ՝ վտանգավոր առողջության համար:

ՀՀԿ-ականների պահվածքը հասկանալի էր, սակայն զարմանալի էր «Լուսավոր Հայաստանի» ներկայացուցիչ Մանե Թանդիլյանի ելույթը, որտեղ նա ընդունեց Արա Բաբլոյանի փաստարկն առ այն, որ սույն քայլը վնասում է մարդկանց առողջությանը: Եվ հետաքրքիր էր նաև, որ նույն պահին մեկ այլ «լուսավոր» Գևորգ Գորգիսյանը թաշկինակով փակել էր քիթը՝ կարծես ապացուցելու համար, որ Բաբլոյանը ճիշտ է, և նման արարքներն անթույլատրելի են:

Հայաստանյան վերջին տարիների պատմության ընթացքում սա առաջին դեպքն է, երբ ընդդիմության քողի տակ հայտնված մարդիկ շատ արագ բացահայտեցին իրենց ով լինելը: Սրանից հետո Գեղամյանին հիշելն արդեն անհարմար կլինի, քանզի նա գոնե մի քանի տարի դիմացավ և միայն քաղաքական թոշակի անցավ այն ժամանակ, երբ վերջնականապես ավարտվել էր որպես գործիչ և ավելորդ ընդդիամդիր հայտ էլ չէր ներկայացնում հանրությանը: Մինչդեռ այս երիտասարդ «լուսավորները» չեն էլ գիտակցում, որ փորձելով փախցնել Շարմազանովի և Աշոտյանի հացը, հանրության աչքերում ընկալվելու են ավելի վատ, քան՝ շարքային ՀՀԿ-ականները:

Դավիթ Մկրտչյան