Իրավիճակը դառնում է օրհասական․ «Հոգևոր Հայաստան»

Հոգևոր Հայաստան նախաձեռնությունը հանդես է եկել հայտարարությամբ, որում մասնավորապես ասվում է․

«Համայն Հայությանը

Հայրենակիցնե՛ր…

Հայաստանի Հանրապետության և հայ ժողովրդի հանդեպ ահագնացող արտաքին ու ներքին մարտահրավերներն իրավիճակը դարձրել են ծայրահեղ տագնապալի։Մինչդեռ հայության անվերապահ աջակցությունը չունեցող իշխանությունը ցանկացած փոփոխություն նախաձեռնում է հենց փոփոխությունները բացառելու միտումով, ինչն է՛լ ավելի է խորացնում ճգնաժամը… Արդյունքում՝ հայրենազրկված, հուսալքված ժողովուրդ և բզկտված հասարակություն…

Այս ամենի հետ չհամակերպվող հայրենանվեր ընդդիմադիրների համար պայքարի միակ այլընտրանքը մնում է առճակատումն ու անձնազոհ ընդվզումը, անկանխատեսելի հետևանքներով։

Իրավիճակը դառնում է օրհասական, երբ իշխանության հանդեպ անվստահությունն ու համատարած հուսահալքությունը փոխանցվում է մաքառող Արցախ, նաև՝ արտերկիր, անարդյունավետ դարձնելով սփյուռքահայության ջանքերը, ովքեր նույնպես իրենց Հայրենիքի քաղաքացին ու տերը լինելու լիիրավ իրավունքն ունեն։ Հոգևոր Հայաստանը ճակատագրական այս պահին հնչեցնելով Հայքն ու Հայոց պետականությունը վտանգված լինելու ահազանգը, միաժամանակ բարձրաձայնում է Հայ ժողովրդի փրկությանն ու վերածննդին միտված միանշանակ հրամայականը՝

ՀԱՄԱՅՆ ՀԱՅՈՒԹՅԱՆ ՄԻԱՍՆՈՒԹՅՈՒՆԸ,

առաջ քաշելով հետևյալ առաջնահերթությունը. • Համայն հայության հարցերի Խորհրդի ձևավորում. Ելնելով խնդրի հրատապ անհրաժեշտությունից, նաև՝ ողջունելով Հայոց տարբեր շրջանակներում արդեն իսկ գործող ազգի ապագայով մտահոգ տարաբնույթ նախաձեռնությունների գործունեությունը, Հոգևոր Հայաստանը համախմբման իր ուղերձն է հղում քաղաքական, հասարակական, ազգանպաստ բոլոր կառույցներին և առանց հապաղելու նախաձեռնում Խորհրդի կայացման և համահայկական օրակարգի ձևավորման շուրջ խորհրդակցություններ սկսել նրանց հայրենանվեր ջանքերի միավորման համար…

Քաղաքակրթական հակամարտության կիզակետի վերածված մեր տարածաշրջանում Հոգևոր Հայաստանը վստահաբար տեսնում է նաև խիզախման ու մեծագույն նվաճումների իրական հնարավորություններ… Պահը պատմական է…

Միասնական, արարչագործ վճռականությամբ արժանի լինենք նոր, իրական Հայաստանի կայացման մեծագույն առաքելությանը»։