ՌԴ-ի հետ 100 միլիոն դոլլարի ռազմական վարկի ձեւակերպումն ավարտված չէ (Տեսանյութ)

Հայաստանյան փորձագիտական շրջանակները դեռեւս մանրամասների չեն տիրապետում այն մասին, որ ՀՀ-ի եւ Ռուսաստանի միջեւ սպառազինության մատակարարման նոր` անտոկոս վարկ է ձեւակերպվելու: Լրագրողների հետ հանդիպմանն այսօր ասաց թուրքագետ Տարոն Հովհաննիսյանն ու միայն նշեց, որ դեռեւս նախորդ տարի ՀՀ-ի եւ ՌԴ-ի միջեւ 100 միլիոն դոլլարի վարկի շուրջ պայմանավորվածություն է ձեռք բերվել. «Մատակարարումները դեռեւս չեն սկսել՝ որքանով տեղյակ եմ, որովհետեւ վարկի ձեւակերպման գործընթացը չի ավարտվել»:

Խոսելով մյուս՝ 200 միլիոն դոլլարի վարկի մասին, փորձագետը նշեց, որ մատակարարումները գրեթե ամբողջությամբ կատարված են. «Նման խոշոր պայմանագրերը տարիներ են պահանջում: Եթե մատակարարումը հասցվել է ավարտին մոտ երկու տարում, դա ուշացում չէ»:

Հիշեցնեն, որ այսօր «Ժամանակ» թերթը գրել է, որ Ռուսաստանը պատրաստվում է երրորդ վարկը տրամադրել Հայաստանին, որով Հայաստանը զենքի հերթական խմբաքանակն է գնելու Ռուսաստանից:

Ըստ աղբյուրի սա լինելու է Ռուսաստանի պատասխանը Ադրբեջանին, որը ոչ միայն հրաժարվում է Ռուսաստանից զենք գնել, այլև նախապատվությունը տալով թուրքական, պակիստանյան, իսրայելական և վերջերս էլ բելառուսական զենքի մատակարարներին, որ ավելի վատ է՝ հակաքարոզչական արշավ է սկսել ռուսական զինտեխնիկայի դեմ, հայտարարելով, որ այն անորակ է ու ոչ արդյունավետ:

Մանրամասները՝ Zham.am-ի տեսանյութում: