Ադրբեջանա-բելառուսական գործարքը կայացավ

Հենց այս պահին Բելառուսի մայրաքաղաք Մինսկում տեղի է ունենում լրագրող/բլոգեր Ալեքսանդր Լապշինի վճռաբեկ դատը: Վերադաս կոչվող դատարանը արգելել է նիստին ներկա լինել ոչ միայն Լապշինի ընտանիքի անդամներին, այլև որ ավելի աբսուրդ է՝ նույնիսկ փաստաբաններին:

Քիչ առաջ ընդմիջում հայտարարվեց: Մինսկից իմ գործընկերները հաղորդում են, որ տեղում են միջազգային բազմաթիվ լրատվամիջոցների ներկայացուցիչներ, որոնք փաստացի աջակցում են Լապշինին: Այնտեղ են նաև միջազգային մի շարք իրավապաշտպան և քաղաքական կազմակերպությունների ներկայացուցիչներ՝ կրկին հանուն Լապշինի:

Գրեթե չեմ կասկածում, որ բելառուսական դատարանը հարցը կլուծի ընդդեմ Լապշինի, քանի որ փետրվարի 3-ին այդպես հստակ ասաց այդ երկրի նախագահ Ալեքսանդր Լուկաշենկոն, որն, ի դեպ, չթաքցրեց, որ ավելի քան 140.000 տոննա նավթ է ստացել Ադրբեջանից, իսկ ավելի վաղ Ալիևի՝ Բելառուս այցի ժամանակ Լուկաշենկոն ասել էր, թե պարտք է Ալիևին և կփորձի վարձահատույց լինել:

Բելառուսական կողմի իրավական ու քաղաքական զանցանքների մասին բազմաթիվ փաստեր կան, որոնցից մեկն անմիջականորեն վերաբերում է Ինտերպոլին: Այդ կառույցը երբևէ հետախուզում չի հայտարարել Լապշինին, այնինչ Լուկաշենկոն ու Ալիևը ստում են, թե եղել է միջազգային հետախուզում:

Բազմաթիվ այլ փաստերի մասին կխոսեմ ավելի ուշ: Մինչ այդ, սպասենք դատարանի այսօրվա որոշմանը, որն արդեն կանխորոշված է:

Ընդամենը նշեմ, որ հիմնականում հայկական կողմի համառ պայքարի շնորհիվ բարձրացավ միջազգային տեղեկատվական, քաղաքական և իրավապաշտպանական աղմուկ, ինչը թույլ չի տա, որ Ադրբեջանում Ալեքսանդր Լապշինի նկատմամբ հաշվեհարդարը լինի դաժան:

***

Ադրբեջանա-բելառուսական գործարքը կայացավ: Բլոգեր Ալեքսանդր Լապշինի վճռաբեկ բողոքը մերժվեց Բելառուսի գերագույն դատարանում: Նույնիսկ դատից րոպեներ առաջ ներկայացված փաստին, որ ադրբեջանական կողմը երբևէ միջազգային հետախուզում չի հայտարարել Լապշինին, և Ինտերպոլի բազաներում էլ Լապշինի անունը ներկայացված չէ (ինչը համառորեն պնդում էր Լուկաշենկոն), չխանգարեց դատարանին՝ որոշել, որ իրենք հակաօրինական գործողությունը կատարում են բացառապես օրենքի սահմաններում:
Լապշինի արտահանձնումը ուժի մեջ է մտնում հրապարակումից անմիջապես հետո:

Նաիրի Հոխիկյանի ֆեյսբուքյան էջից