Ինչո՞ւ էք զարմանում Հրանուշ Հակոբյանի խոսքերից` ապագա վարչապետի վերաբերյալ

Հայաստանը դարձել է հետաքրքիր երկիր: Հրանուշ Հակոբյանը զարմանում է, որ հանրությունը բացասական է տրամադրված, որ Սերժ Սարգսյանը 3-րդ ժամկետում կառավարի երկիրը, այս անգամ` վարչապետի պաշտոնում: Իսկ հանրությունն էլ զարմանում է տիկին Հրանուշի մտքերից:

Իսկ ինչ էր սպասում հասարակությունը տիկին Հրանուշից, ով անհիշելի ժամանակներից պաշտոն է զբաղեցնում: ԽՍՀՄ-ի ժամանակ նա կոմսոմոլի ղեկավարն էր և բոլորին համոզում էր թե ինչ լավ համակարգում ենք ապրում: Տեր-Պետրոսյանի ժամանակ փնովում էր այդ նույն կոմունիզմը և աջակցում ՀՀՇ-ին: Քոչարյանի ժամանակ արդեն փնովում էր ՀՀՇ-ին և գովում Քոչարյանին, իսկ հիմա զարմանում է որ չեն տեսնում Սերժ Սարգսյանի արժանիքները: Իրականում տիկին Հրանուշի գլխավոր նպատակը միշտ աթոռն է եղել , այլ ոչ թե կոմունիզմը, ՀՀՇ-ն կամ ՀՀԿ-ն: Նրա  կյանքի գլխավոր կրեդոն հետևյալ կարգախոսն է՝  «ով էշ, ես՝ փալան»: Այս ամենը հասկանալի է, սակայն հասկանալի չէ հանրության վրդովմունքը ով արդեն 30 տարուց ավել հանդուրժում է այս տիկնոջ տեղն ու դերը երկրում: Այսպիսի հանրությունը հենց Հրանուշին է արժանի, ով ամեն օր, ամեն ժամ, ամեն րոպե հանդուրժում է այս բարքերը: Այնպես որ, միայն Սերժ Սարգսյանից բողոքելը այդքան էլ ազնիվ չէ: Մենք ենք այսպիսի հասարակություն և երկիր սարքել, որտեղ այսպիսի բարքերը դարձել են բնական նորմ:

Սա է իրականությունը:

Դավիթ Մկրտչյան


Լոսանկարը՝ Sputnik Արմենիա-ի: