Բաքվի ու Մոսկվայի միջև նոր սկանդա՞լ է հասունանում

Պարզվում է Զատուլինի այն խոսքերը, թե Մոսկվան Ադրբեջանին մատակարարել է անորակ զինամթերք, անհիմն չեն: Նույն բանի մասին վերջերս գրել է նաև բելառուսական թերթերից մեկը: Ավելին, ըստ այդ պարբերականի, Մոսկվայի ու Բաքվի միջև նոր սկանդալ է հասունանում այդ առթիվ: Պարզվում է, 2017-ի ամռանը Ադրբեջանը պաշտոնապես բողոքել է , որ մատակարարված ռուսական զենքը շատ դեպքերում իր նշանակությանը չի ծառայում: Բերվել են նույնիսկ կոնկրետ օրինակներ: «Смерч» տիպի հրթիռները կրակելու ընթացքում չէին պայթում, նույնը կատարվում էր նաև «Атака-м» և «Штурм-Б» հրթիռների հետ, Ми-35 ուղղաթիռները ընդհանրապես բազմաթիվ անսարքություններով էին մատակարարված, և շատ ու շատ նման օրինակներ: Սակայն ամենաշատը ադրբեջանցիներին վրդովեցրել է այն հանգամանքը, որ այս անսարքությունները խոստովանելու հետ մեկտեղ, ռուսները երաշխիք չեն տվել, որ դրանք կշտկվեն այս տարվա ընթացքում: Ավելին, Մոսկվան խոստացել է այդ անսարքությունները վերացնել մինջև…2022 թվականը, ինչը խիստ դժգոհություն է առաջացրել Բաքվում:

Բացահայտելով Մոսկվայի ու Բաքվի միջև առաջացած այս թաքնված ճգնաժամը, բելառուսական պարբերականը նշում է, որ ադրբեջանցիները կարող են այս բացը կոմպենսացնել Բելառուսի միջոցով: Ըստ այդ պարբերականի, անցած տարվա վերջում Ադրբեջանի պաշտպանության նախարարի այցը Մինսկ հենց այդ հանգամանքով էր պայմանավորված: Պարբերականը հատուկ ընդգծում է, որ ի տարբերություն ռուսների, Մինսկը քաղաքական կախվածություն չունի Հայաստանից և պատրաստ է մատակարարել Բաքվին իսկապես որակյալ զինամթերքի տեսակներ՝ ակնարկելով, որ հավանաբար ռուսները գիտակցաբար են խաբել ադրբեջանցիներին, որպեսզի չտուժի Մոսկվայի դաշնակից Հայաստանը:

Հակոբ Կարապետյան