Ժիրայր Սեֆիլյանը դատապարտվեց 10.5 տարվա ազատազրկման. Տեսանյութ

Այսօր, մարտի 20-ին Երևանի ընդհանուր իրավասության դատարանի Շենգավիթի նստավայրում հրապարակվեց Ժիրայր Սեֆիլյանի, Գևորգ Սաֆարյանի և մյուսների գործով դատավճիռը։ Հիմնադիր խորհրդարանի ղեկավար Ժիրայր Սեֆիլյանը դատապարտվեց տասը տարվա և վեց ամսվա ազատազրկման։

Ժիրայր Սեֆիլյանին մեղադրանք է առաջադրվել այն բանի համար, որ նա 2014-ից սկսել է նախապատրաստել զինված հարձակումներ, իսկ 2015թ․ նոյեմբերից մինչև 2016թ․ մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել և փոխադրել հրազեն և ռազմամթերք՝ նպատակ ունենալով ռազմավարական նշանակության շինություններ զավթել, սակայն մտադրույթունները ավարտին չի հասցրել։ Ըստ մեղադրանքի՝ նա պետք է զավթեր նախագահականի և այլ շենքեր, ինչպես նաև հեռուստաաշտարակն ու մի քանի զորամասեր։ Բացի այդ, նրան մեղադրանք է առաջադրվել ապօրինի զենքի շրջանառության համար։

Ըստ Սեֆիլյանի՝ Հայաստանի իշխանությունները մշտապես իրեն նախազգուշացրել են՝ դադարեցնել քաղաքական ակտիվությունը՝ հակառակ պարագայում սպառնալով դատել։

Սեֆիլյանը հայտարարել է, որ «ռուսները որոշել են սպանել իրեն»։ Ըստ Հիմնադիր խորհրդարանի ղեկավարի, դա պետք է տեղի ունենար 2015-ի մարտի 6-ին, երբ ընդդիմադիր ուժն իր համակիրների հետ մեկնում էր Գյումրի։

Հիմնադիր խորհրդարանի ղեկավարն իր վերջին խոսքում էլ զգուշացրել է՝ «դիմադրությունը դառնալու է ավելի կոշտ և վճռական»։

Բացի Սեֆիլյանից՝ գործով մեղադրանք էր առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:

Հրապարակած դատավճռով Գեւորգ Սաֆարյանն էլ դատապարտվեց 4 տարվա ազատազրկման, դրան գումարվեց առաջին դատավճռի 2 տարի ժամկետը եւ վերջնական պատիժ սահմանվեց 5 տարի 6 ամիս ազատազրկում: Գործով Ներսես Պողոսյանը դատապարտվեց 3 տարի 6 ամիս ժամկետով ազատազրկման, Գալուստ Գրիգորյանը՝ 3 տարի, Հրայր Թոփչյանը՝ 3 տարի, Սասունիկ Կիրակոսյանը՝ 3 տարի 6 ամիս, Հովհաննես Պետրոսյանը՝ 2 տարի ժամկետով ազատազրկման:

">