Ես քաղհալածյալ եմ. Խաչիկ Գալստյանը՝ դատարանում
ԵՊՀ նախկին դասախոս, քաղաքագետ, «Հայրենիք» կուսակցության գլխավոր քարտուղար Խաչիկ Գալստյանը, որ Վաղարշապատի համայնքի ղեկավարի ընտրություններից հետո գտնվում է տնային կալանքում, ընթացող դատական նիստում դատավորին տեղեկացրեց, որ պրոբացիայի, ոստիկանության աշխատակիցները երբեմն չեն կարողանում ուղեկցել իրեն, ինչի հետևանքով չի կարողանում մասնակցել իր իրավունքների պաշտպանությանը։ Նա հետաքրքրվեց, եթե նման դեպք կրկնվի, կարո՞ղ է ինքը դատարան գալ փաստաբաների ուղեկցությամբ։
Անդրադառնալով վկայի հարցաքննության ընթացքում հնչեցրած հայտարարություններին՝ Գալստյանը նշեց, որ հարցաքննությունը ցույց տվեց, որ իր առանչությունը մեղսագրվող հանցանքի հետ աղերս չունի։
Օգտվելով դատարանում ԶԼՄ-ների ներկայությունից ու ուղիղ հեռարձակումից Խաչիկ Գալստյանը, որ տնային կալանքի ընթացքում զրկված է հաղորդակցության բոլոր իրավունքներից, շնորհակալություն հայտնեց երեկ իր 50-ամյակի առթիվ ստացած շնորհավորանքների համար։
«Իմ խորին շնորհակալություն եմ հայտնում իմ ուսանողներին գաղափարակիցներին, իմ կամքն անկոտրում է։ Ես քաղաքական հալածյալ եմ»,-ասաց նա։
Աղբյուրը` Panorama.am

