Ոչ պակաս վտանգավոր, քան ծխախոտը. Վեյփն ընդամենը 7 ամսում քայքայում է երիտասարդների թոքերը

Էլեկտրոնային ծխախոտների երկարատև օգտագործումը կարող է երիտասարդների շնչառական համակարգի վրա թողնել նույն վնասակար ազդեցությունը, ինչ ծխախոտը: Tobacco Control  ամսագրում հրապարակված նոր հետազոտության համաձայն՝ ընդամենը յոթ ամսվա ընթացքում վեյփ օգտագործողների թոքերի ֆունկցիոնալ աշխատանքը վատթարացել է։

Ֆլորիդայի միջազգային համալսարանի գիտնականների իրականացրած ուսումնասիրությունն առաջ է քաշում այն վարկածը,  որ էլեկտրոնային ծխախոտի երկարատև  օգտագործումը կարող է հանգեցնել թոքերի քրոնիկ օբստրուկտիվ հիվանդության (COPD) զարգացման ռիսկի:

Հետազոտության հեղինակների նպատակն էր պարզել՝  էլեկտրոնային ծխախոտի երկարատև օգտագործումն ինչպիսի՞ ազդեցություն է թողնում երիտասարդների թոքերի բնականոն աշխատանքի վրա: Փորձարկմանը մասնակցել է 21-35 տարեկան 22 անձ, որոնց  թոքերի շնչառական ֆունկցիոնալությունը գնահատվել է յոթ ամսվա տարբերությամբ անցկացված երկու սպիրոմետրիաների միջոցով: Այդ հետազոտությունների ընթացքում չափել են մեկ վայրկյանում թոքերից արտաշնչվող օդի ծավալը: Արդյունքների ճշգրտությունն ապահովելու և կարճաժամկետ ազդեցությունը բացառելու նպատակով՝ բոլոր մասնակիցները թեստավորումից առաջ 12 ժամ վեյփ չեն օգտագործել, իսկ տվյալների հավաքագրումն իրականացվել է յոթ ամսվա ընթացքում օրգանիզմում տեղի ունեցող փոփոխությունների դինամիկան գնահատելու համար:

Յոթ ամիս անց հետազոտողներն արձանագրել են մասնակիցների թոքերի արտաշնչելու ունակության էական անկում: Մասնավորապես, սպիրոմետրիայի միջին ցուցանիշը 3.85 լիտրից նվազել է մինչև 3.75 լիտր՝ արձանագրելով 0.10 լիտրով անկում: Գիտնականները նշում են նաև, որ որքան հաճախակի են մասնակիցները օգտագործել էլեկտրոնային ծխախոտ, այնքան ավելի արագ է տեղի ունեցել շնչառական ֆունկցիոնալության անկումը:

Հետազոտողների գնահատմամբ՝ արձանագրված ցուցանիշները թոքերի քրոնիկ օբստրուկտիվ հիվանդության զարգացման նախանշաններ են: Այս անբուժելի հիվանդությունն անդառնալիորեն վնասում է շնչուղիները՝ առաջացնելով քրոնիկ հազ, խորխարտադրություն, հևոց, շնչառության դժվարացում: Հետազոտության մեջ նշվում է, որ ստացված արդյունքները արտացոլում են ավանդական ծխախոտ ծխողների շնչառական ֆունկցիայի վերաբերյալ նախկին հետազոտությունների տվյալները՝ վերահաստատելով միևնույն վնասակար ազդեցությունները:

Լոնդոնի համալսարանական քոլեջի պրոֆեսոր Լայոն Շահաբը, սակայն, նշում է, որ հետազոտության փոքր ընտրանքի պատճառով դեռևս վաղ է վեյփինգի անմիջական երկարատև ազդեցության մասին վերջնական պնդումներ անելը, թեև ստացված ազդանշանները լուրջ ուշադրության են արժանի: Այսպիսով, թեև երիտասարդները հաճած կարծում են՝ էլեկտրոնային սիգարետներն առավել անվտանգ են, քան սովորական ծխախոտը, ստացված տվյալները փաստում են, որ դրանց օգտագործումը կարող է առաջացնել թոքերի ֆունկցիոնալ փոփոխություններ՝ մեծացնելով շնչառական քրոնիկ հիվանդությունների ռիսկը:
Աղբյուրը` Panorama.am