Գևորգ Ղազարյան. Հայտարարում եմ ՀՖՖ նախագահի պաշտոնում առաջադրվելու իմ որոշման մասին, միասին՝ հանուն հայկական ֆուտբոլի

Հայաստանի հավաքականի նախկին ֆուտբոլիստ Գևորգ Ղազարյանը հայտնել է Հայաստանի ֆուտբոլի ֆդերացիայի նախագահի պաշտոնում առաջադրվելու մասին։ 

Նա տեսանյութ է տարածել, որում մասնավորապես ասում է. «Մինչ այժմ չեմ շտապել հրապարակային հայտարարությամբ հանդես գալ, քանի որ ինձ համար սա պարզապես պաշտոնի կամ անձնական հավակնությունների հարց չէ, խոսքը հայկական ֆուտբոլի ապագայի և մեծ պատասխանատվության մասին է։ 

Իմ կյանքի մեծ մասը անցել է ֆուտբոլում, տարիներ շարունակ պատիվ եմ ունեցել ներկայացնելու Հայաստանի ազգային հավաքականը, հանդես եմ եկել հայկական և արտասահմանյան  ակումբներում, ճանաչել տարբեր ֆուտբոլային համակարգեր, ներսից տեսել մեր ֆուտբոլային խնդիրներն ու հնարավորությոնները։ 

Համոզված եմ՝ հայկական ֆուտբոլը շատ ավելի մեծ ներուժ ունի, քան այսօր կարողանում ենք իրացնել։ Մեզ անհրաժեշտ են համակարգային փոփոխություններ, հստակ ռազմավարություն,  մասնագիտական կառավարում, երկարաժամկետ զարգացման ծրագիր։

Առաջնահերթությունները պետք է լինեն՝ մանապատանեկան ֆուտբոլի զարգացումը, մարզիչների կրթությունը, ժամանակակից ենթակառուցվածքները, ակումբերի հետ արդյունավետ համագործակցությունը, ազգային հավաքականների մրցունակության բարձրացումը։ 

Իմ թեկնածության առաջադրումը ինքնապատակ չէ, չի կարող լինել, ինձ համար կարևոր է՝ իմ մասնակցությունը լինի  գիտակցված, հիմնավորված և ընկալելի ոչ միայն ինձ աջակցող երկրպագուների, նաև ֆոտբոլային հանրության լայն շրջանակների համար։ 

Ես պատրաստ եմ իմ գիտելքները, փորձն ու հնարավորությունները ներդնել հայկական ֆուտբոլի զարգացման գործում։

Չեմ կարծում մեկ մարդը կարող է լուծել տարիներով կուտակված բոլոր խնդիրները։ Մեզ անհրաժեշտ է համախմբել ֆուտբոլային հանրության կարող ուժերին, ձևավորել մասնագիտական թիմ և հետևողական աշխատանքներով հասնել իրական, չափելի փոփոխությունների։ 

Մեր նպատակը պետք է լինի ոչ թե նոր նախագահի ընտրությունը, այլ այնպիսի կառավարման համակարգի ձևավորումը, որը  կվայելի ֆուտբոլայի հանրության վստահությունը և իրական հնարավորություններ կստեղծի հայկական ֆուտբոլի զարգացման համար։

Ընդունելով  երկրպագուների առաջարկը՝ հայտարարում եմ Հայաստանի ֆուտբոլի ֆեդերացիայի նախագահի պաշտոնում առաջադրվելու իմ որոշման մասին։ Սա մեկ մարդու ճանապարհ չէ, սա մեր ընդհանուր գործն է, միասին՝ հանուն հայկական ֆուտբոլի»։

Հիշեցնենք, որ ՀՖՖ գործող նախագահ Արմեն Մելիքբեկյանը պաշտոնում վերընտրվել է 2023 թվականի դեկտեմբերին։ Ավելի վաղ Արմեն Մելիքբեկյանը հայտնել էր, որ  մտադրություն չունի դեկտեմբերին առաջադրվել նույն պաշտոնում։