Երևանում ավտոմեքենայով շարժվելը կդառնա շքեղություն. Տիգրան Ավինյան

«Մենք ունենք ահագնացող խցանումների խնդիր։ Կարելի է ասել դա ամենահիմնարար խնդիրն է, որ առկա է քաղաքում»,- ԱԺ-ում 2027 թվականի պետակա բյուջեի քննարկմանն ասաց Երևանի քաղաքապետ Տիգրան Ավինյանը։ 

Նա նշեց, որ խցանումների հետ կապված ունեն արդեն իսկ կայացած վերլուծական կենտրոն, տեսախցիկներով կարողանում են տեսնել, թե ինչ է կատարվում Երևանում. «Օրինակ, 100 խաչմերուկների վերլուծությունից մենք տեսնում ենք, որ 100-ից 85 տոկոս դեպքերում  խցանումները սկսվում են առաջանալ այն պայմաններում, երբ որ որևէ մի մեքենա վերջին վայրկյանին կանաչով անցնում է,  գնում ու կանգնում է խաչմերուկում։ 

Ամենավատն այն է, որ այդ մեքենաների մի էական մաս մեր իսկ ավտոբուսներն են»։

Ավինյանը նշեց, որ Երևանում շարունակաբար տնտեսական վիճակը որքան բարելավի, մարդիկ գումար ունենան, տրամաբանական է, որ մեքենաների քանակն ավելանալու է։

«Դրան կա մեկ լուծում, որը կիրառվել է գրեթե բոլոր զարգացած քաղաքներում՝ առաջնահերթությունը տալ հանրային տրանսպորտին, այսինքն առանձնացված գծերի լուծումն է,  ավտոմեքենաների համար որոշակի սահմանափակումները։ 

Սա խնդիր է ստեղծելու մարդատար ավտոմեքենաների համար։ Պետք է մեքենաների համար համապատասխան ենթակառուցվածք ստեղծել՝ կայանման տեսանկյունից։  Ավտոմեքենայով շարժվելը, այսպես ասած, մի փոքր շքեղություն կդառնա։ Մեր փողոցները ռեզինից չեն, չեն կարող անընդհատ ընդլայնվել։ 

Առանց սահմանափակումների մենք չենք կարող ունենալ որևէ լուծում»,- ասաց Ավինյանը։ 
Աղբյուրը` Panorama.am