ՌԴ ԱԳՆ-ն խորհուրդ է տալիս Հայաստանին հանրաքվե անցկացնել նախքան ԵՄ-ին անդամակցության հայտ ներկայացնելը

Հայաստանում՝ Եվրամիությանը միանալու վերաբերյալ հայտ ներկայացնելուց առաջ պետք է անցկացվի հանրաքվե։ ՏԱՍՍ-ի հաղորդմամբ, ասել է Ռուսաստանի փոխարտգործնախարար Ալեքսանդր Պանկինը։

«Նիկոլ Փաշինյանի թիմի կողմից նախաձեռնված Եվրամիությունում Հայաստանի համար տեղի որոնումները հանգեցրել են պարադոքսալ իրավիճակի, երբ Եվրասիական տնտեսական միության մասնակցությունից ստացվող իրական օգուտներն օգտագործվում են «ինտեգրացիոն այլ բլոկ տեղափոխվելու անցողիկ գաղափարը» առաջ մղելու համար», - ասել է նա։ 

Նրա կարծիքով, «ներկայիս պայմաններում տրամաբանական կլինի հանրաքվեի անցկացումը, որի ժամանակ Հայաստանի ժողովուրդը կարտահայտի իր կամքը, ինչպես ամրագրված է երկրի Սահմանադրությամբ, իր հետագա ինտեգրացիոն ուղու հարցի վերաբերյալ»։ «Ավելին, տրամաբանությունը թելադրում է, որ նախ պետք է հանրաքվե անցկացվի, հարցվի ժողովրդին, ապա պաշտոնական հայտ ներկայացվի Բրյուսել, այլ ոչ թե հակառակը, ինչպես վերջերս հրապարակավ պնդում է Հայաստանի ղեկավարությունը», - հայտարարել է Պանկինը։ Փոխնախարարը բացատրել է. «Եթե դիմում ներկայացվի, ժողովրդի կարծիքը այլևս ոչ մեկին չի հետաքրքրի»։

«Եվրասիական տնտեսական միության անդամ լինելու շրջանակներում Հայաստանի ստացած հստակ առավելությունների և ինտեգրացիոն կապերի խզումից հնարավոր կորուստների օբյեկտիվ ըմբռնումն ապահովելու համար հանրությանը վերջերս ներկայացվեց զեկույց, որը պատրաստվել էր Բելառուսի, Ղազախստանի, Ղրղզստանի և Ռուսաստանի նախագահների համատեղ հայտարարության համաձայն՝ Հայաստանի համար ԵԱՏՄ պայմանագրի կասեցման հնարավոր հետևանքների վերաբերյալ», - հիշեցրել է Ռուսաստանի փոխարտգործնախարարը։

Նա պարզաբանել է, որ զեկույցում ուրվագծված սցենարը «դիտարկվում է որպես վերջին միջոց՝ տնտեսական անվտանգությանը սպառնացող ռիսկերը և Միության անդամ պետություններին հասցվող վնասը կանխելու համար»։

«Կիրականացվի՞, թե՞ ոչ, կախված է Հայաստանի ղեկավարության պատրաստակամությունից՝ անդրադառնալու Եվրասիական տնտեսական միության մնացած անդամ պետությունների մտահոգություններին», - հայտարարել է Պանկինը՝ նշելով, որ Մոսկվան դեռևս այս հարցի վերաբերյալ որևէ կառուցողական ազդանշան չի ստացել Երևանից։ 
Աղբյուրը` Panorama.am