Իսրայելում հաշվել են ավելի քան 4 միլիոն ձայն. Կանխատեսվում է՝ Նեթանյահուն կստանա 54 տեղ, ընդդիմությունը՝ 49

Չորեքշաբթի առավոտյան՝ ավելի քան 4 միլիոն ձայն հաշվելուց հետո Իսրայելի Կենտրոնական ընտրական հանձնաժողովը հայտարարել է, որ վարչապետ Բենյամին Նեթանյահուի դաշինքը, ըստ կանխատեսումների, Քնեսեթում կունենա 54 մանդատ։

The Jerusalem Post-ը գրում է՝ կանխատեսվում է, որ Նեթանյահուի «Լիկուդ» կուսակցությունը կստանա 27 մանդատ, «Յահադութ հա-Թորա»-ն, «Շաս»-ը և «Օցմա Յեհուդիտ»-ը՝ յուրաքանչյուրը 7-ական մանդատ, իսկ «Կրոնական սիոնիստական ​​կուսակցությունը»՝ 6 մանդատ։

Ըստ ԿԸՀ-ի տվյալների՝ ընդդիմադիր դաշինքը, որի կազմում են «Յաշար»-ը, «Բիյախադ»-ը, «Իսրայել Բեյտենու»-ն և «Դեմոկրատներ»-ը,  Քնեսեթ կմտնի 49 մանդատով։

Կանխատեսվում է, որ Գադի Այզենկոտի «Յաշար» կուսակցությունը Քնեսեթում կունենա 22 մանդատ։ Ակնկալվում է, որ Նաֆտալի Բենեթի և Յաիր Լապիդի գլխավորած «Բիյախադ»-ը կունենան 12 մանդատ։ Յաիր Գոլանի «Դեմոկրատներ»-ը, ըստ կանխատեսումների, Քնեսեթ կմտնեն ութ մանդատով, իսկ Ավիգդոր Լիբերմանի «Իսրայել Բեյտենու»-ն՝ յոթ մանդատով։

Ըստ Կենտրոնական ընտրական հանձնաժողովի (ԿԸՀ) վերջին տվյալների՝ արաբական կուսակցություններին բաժին է հասնում 19 մանդատ. հաջորդ Քնեսեթում «Միացյալ ցուցակ»-ը կունենա 11, իսկ «Ռաամ»-ը՝ 6 մանդատ։

Այզենկոտը կոչ է արել, որ ընդդիմադիր դաշինքի ամենամեծ կուսակցության առաջնորդը դառնա վարչապետի թեկնածու, չնայած դաշինքի ներսում որևէ համաձայնության մասին չի հայտարարվել։

Քաղաքական փակուղին, ի վերջո, կարող է հանգեցնել մեկ այլ ընտրության, չնայած կուսակցությունները դեռ կարող են համաձայնության գալ կոալիցիոն բանակցությունների միջոցով։