«Սպորտում առանց պարտության հաղթանակ չի լինում... նոր ռեկորդ սահմանեցինք մեզ համար». ինչ են պատմում ԱԱ-ում հաղթած մարմնամարզիկները

«Աշխարհի առաջնությունում Հայաստանի տղամարդկանց սպորտային մարմնամարզության հավաքականի մասնակցությունը գնահատում եմ գերազանց։ Ապրենք իրենք, հպարտանում եմ իմ տղաներով»,- ասուլիսում ասաց  հավաքականի գլխավոր մարզիչ Հակոբ Սերոբյանը։

Հավաքականի մարզիչ Հայկ Նազարյանն ասաց՝  ինչ դրված էր մարզիկների առջև, արեցին. «Շնորհակալ ենք տղաներից, որ մեր կողքին են, որ այսպիսի տղաներ կան։ Նման բան չէր եղել»։ 

Հիշեցնենք՝ աշխարհի առաջնությունում Հայաստանի տղամարդկանց սպորտային մարմնամարզության հավաքականը  նվաճել է 4 մեդալ՝ 2 ոսկե և 2 բրոնզե. Արթուր Դավթյան՝ ոսկե մեդալ հենացատկում, Համլետ Մանուկյան՝ ոսկե մեդալ նժույգ թափերում, Մամիկոն Խաչատրյան՝ բրոնզե մեդալ նժույգ թափերում, Արթուր Ավետիսյան՝ բրոնզե մեդալ օղակների վարժությունում։

«Այս արդյունքն ինձ համար անակնկալ էր։ Սպասում էի երկու մեդալ՝ Համելտ Մանուկյանից ու Արթուր Դավթյանից։ Իրենք պատրաստ էին, մյուս երկու մարզիկը՝ ոչ»,- ասաց Հակոբ Սերոբյան՝ ընդգծելով, որ Արթուր Դավթյանի մասին խոսք չկա, «մուռը հանեց Եվրոպայի առաջնությունից»։ 

Բրոնզե մեդալակիր Արթուր Ավետիսյան. «Ուրախ եմ, որ կարողացա մեդալ նվաճել։ Ես ինքս իմ կատարումից գոհ չեմ, չարեցի այն, ինչ-որ կարող էի անել, ինչ իմ առջև դրված էր։ Կաշխատենք, որ մյուս մրցումներին վրիպումներ չլինեն»։ 

Ոսկե մեդալակիր Արթուր Դավթյան. «Շատ ուրախ եմ, որ կարողացա ևս մեկ անգամ աշխարհի չեմպիոն դառնալ։ Եվրոպայի առաջնությունից հետո շատ դժվար էր, բայց դե սպորտում առանց պարտության հաղթանակ չի լինում։ Աշխարհի առաջնությանը հավաքվեցի ու կարողացա անել այն, ինչ կարող էի։

Այս ամենը թիմային աշխատանքի արդյունք է։ Ուրախ եմ բոլորիս մեդալների համար։ Բոլորս էլ շատ լավ մասնակցեցինք, նոր ռեկորդ սահմանեցինք մեզ համար։

Աշխարհի առաջնությունը չի կարող հեշտ լինել»։

Ոսկե մեդալակիր Համլետ Մանուկյան. «Շատ ուրախ եմ ինձ ու իմ ընկերների համար։ 

Սպասելիքներ կար։ Անցած տարվա աշխարհի առաջնությունում ձախողումից հետո սպասել եմ այս առաջնությանը։ Մրցակցությունը շատ մեծ էր, աշխարհի ուժեղագույն մարզիկներն էին։ Այդ օրը մեր օրն էր, ստացվեց»։ 

Բրոնզես մեդալակիր Մամիկոն Խաչատրյան. «Բարդ ստացվեց, մրցակցությունն ուժեղ էր. եզրակափիչ անցած 8 մարզիկներն էլ լավ կատարեցին իրենց վարժությունները։ Մենք շատ էինք չարչարվել մարզումների ժամանակ, շատ էինք աշխատել։ Պետք էր այդ պահին հավաքվել ու կատարել այն, ինչ կատարում էինք մարզումների ժամանակ։

Էմոցիաներն ինքնաբերաբար են ստացվում։ Երբ որ տեսնում ես դու և ընկերդ դառնում եք աշխարհի առաջնության չեմպիոն ու մեդալակիր, որը մեր երազանք է եղել, աննկարագրելի է այդ զգացումը, որ ընկերոջդ հետ ես կիսում պատվո հարթակը։

Դրան շատ երկար էինք սպասել»։ 
Աղբյուրը` Panorama.am