Եկեք ներողություն խնդրեք Նարեկ Կարապետյանից․ Արամ Վարդևանյանը՝ ՔՊ-ականներին

«Խնդիր ենք տեսնում, որ գալիս են ու քննարկվող հարցից շեղվում են, շեղվում են լկտի ստերով»,-իր ելույթում ասաց ԱԺ փոխնախագահ «Ուժեղ Հայաստան» խմբակցության պատգամավոր Արամ Վարդևանյանը։

Ակնարկելով ՔՊ-ական պատգամավոր Տարոն Չախոյանի ելույթը, որում նա ասաց, թե Սամվել Կարապետյանի ռուսական անձնագիրը տված է  ՌԴ ԱԴԾ-ի կողմից՝ Վարդևանյանն ասաց. «Այդ մասին հայտարարողը տեղյա՞կ է, որ այդպիսի գրառում կա ՀՀ քաղաքացիություն ունեցող հարյուրավոր, հազարավոր մեր հայրենակիցների անձնագրերում, որը տրվել է նշված կառույցի կողմից և որևէ առնչություն չունի դրա հետ»։

Նա հորդորեց սուտ խոսելուց հետո դրա հետ առերեսվեն և հիշեցրեց, որ նաև Տարոն Չախոյանն է հայտարարել, որ Նարեկ Կարապետյանը այլ երկրի քաղաքացիություն ունի։

«Եկեք դուք կամ ձեր գործընկերը, կամ ով որ ասել է, ներողություն խնդրեք Նարեկ Կարապետյանից, եկեք նաև ձեր քննչական կոմիտեի համար էլ ներողություն խնդրեք, որ քարոզարշավի ամենապատասխանատու փուլում, հերթական սև քարոզն արեցիք և սուտը տարածեցիք»,-ասաց Վարդևանյանը  և հորդորեց քննարկվող նախագծից՝ Խաղաղության խորհրդի կանոնադրությունը վավերացնելու մասին  օրինագծից չշեղվել, որի վերաբերյալ «Ուժեղ Հայաստան» խմբակցությունը դրական կարծիք ունի։