ԹՐԻՓՓ պայմանագիրը թղթի վրա երկկողմ է՝ ՀՀ-ԱՄՆ, բայց բովանդակության մեջ առկա է երրորդ կողմը՝ Ադրբեջանը. Աննա Գրիգորյան

«ԹՐԻՓՓ նախագծի պայմանագիրը փաստացի, թղթի վրա երկկողմ է՝ Հայաստանն ու ԱՄՆ-ն, բայց իր էության, բովանդակության մեջ առկա է երրորդ կողմը, մանավորապես, Ադրբեջանը»,- ԱԺ-ում ԹՐԻՓՓ համաձայնագրի վավերացման նախագծի քննարկման ժամանակ ունեցած իր ելույթում ասաց «Հայաստան» խմբակցության ղեկավար Աննա Գրիգորյանը։

Ըստ նրա, Ադրբեջանի շահերն ավելի ուղիղ են արտացոված այս փաստաթղթում, քան կարող է լինել ՀՀ շահը։ 

«Ինչ է ստանում կողմերից ԱՄՆ-ն՝ ուղիղ ներկայացվածություն տարածաշրջանում, եթե նույնիսկ քաղաքացիական ներկայացվածություն է լինելու, այդ ներկայացվածությունը լինելու է  Իրանի հետ սահմանին՝ կարևոր ստրատեգիական հատվածում։ 

Ադրբեջանը ստանում է անխոչընդոտ կապ Նախիջևանի հետ, մի բան, որ եղել է  Ադրբեջանի և Թուրքիայի մշտական երազանքը, ռազմավարական նպատակը և դրա իրականացումն արտացոլվում է այս փաստաթղթում։ 

Ի՞նչ է ստանում Հայաստանը. այդ հարցին երբ որ քաղաքական մեծամասնությունը պատասխանում է, սովորաբար առաջինն ասում է՝ ապաշրջափակում։  Հողի վրա որևէ կոմունիկացիա չի ապաշրջափակվում, որևէ սահման չի բացվում։ Այսինքն առաջին պատասխանն արդեն իսկ սխալ է։

Ասում են՝ Ադրբեջանը թույլ է տալիս իր տարածքով բեռներ գան Հայաստան։ 

Փաստացի, այն բեռները, որոնք Ռուսաստանից Վրաստանով Հայաստան են գալիս, հիմա Ռուսատանից գնում են Ադրբեջան, այնուհետև Վրաստան, ապա Հայաստան։ Սա համարվում է համարժեք ապաշրջափակում։ Այսինքն, մեր տարածքը տվել եք ադրբեջանցիներին, իրենց համար անխոչընդոտ գնալու են, գալ, իսկ մեզ համար այդ հնարավորությունը, որը ընդհանրապես տնտեսական էֆեկտ չի ունենալու»,- ասաց ընդդիմադիր պատգամավորը։ 

Ըստ նրա, Ադրբեջանն ունեցել է հիմնական մեկ պահանջ՝ հայի դեմք չտեսնել. «Այս գործընթացում Հայաստանի քաղաքացու հետ ադրբեջանցիները չեն առնչվելու։  Սա անընդունելի է,  որովհետև մեր ինքնիշխանության սահմափակում է  տեղի ունենալու։ Եթե ոչ, եկեք, բացատրեք, մեր բեռները Ադրբեջանի տարածքով անցնելիս հայ բեռնատարը  տեսնելո՞ւ է ադրբեջանո՞ւ, թե ոչ։  Բնականաբար, տեսնելու է։ Այստեղ ձեր փոխադարձության  միֆերը միանգամից հօդս են ցնդում»։ 

Աննա Գրիգորյանը հայտարարեց, որ այս ամենը հաշվի առնելով՝ «Հայաստան» խմբակցությանը դեմ է քվեարկելու  «Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) վերաբերյալ ռազմավարական համագործակցության մասին շրջանակային համաձայնագիրը վավերացնելու մասին նախագծին։