ՔՊ-ն փակ նիստերում քննարկում է Արցախի, ՀՀ անկախության Հռչակագրի և եկեղեցու հարցերը․ «Ժողովուրդ»
«Ժողովուրդ» օրաթերթը գրում է. ««Ժողովուրդ» օրաթերթի՝ կառավարությանը մոտ կանգնած աղբյուրների փոխանցմամբ՝ Նիկոլ Փաշինյանը որոշել է ՔՊ վարչության մի քանի արտահերթ հանդիպումների ընթացքում ակտիվորեն քննարկել նոր Սահմանադրության նախագիծը։ Ըստ մեր տեղեկությունների՝ իշխող կուսակցության վարչությունը ցանկանում է նախագծի դրույթների վերաբերյալ սեփական դիրքորոշումն ու առաջարկները ներկայացնել՝ անդրադառնալով առանձին կետերի։
Մեր աղբյուրների փոխանցմամբ՝ Փաշինյանը լիովին համակարծիք չէ սահմանադրական փոփոխությունների հանձնաժողովի հետ քննարկված և այս պահին նախագծում արտացոլված բոլոր ձևակերպումների հետ։ Հենց այս հանգամանքով է պայմանավորված, որ ՔՊ վարչությունը որոշել է առանձին քննարկել նախագծի դրույթները, ներկայացնել իր դիրքորոշումները և առաջարկել փոփոխություններ։
Այսինքն՝ սահմանադրական փոփոխությունների հարցը քննարկվում է ոչ միայն մասնագիտական հանձնաժողովի շրջանակում, այլև իշխանական կուսակցության ղեկավար կազմն է ցանկանում իր խոսքն ասել երկրի մայր օրենքի նոր տարբերակի ձևավորման հարցում։
«Ժողովուրդ» օրաթերթի աղբյուրների փոխանցմամբ՝ քննարկվող առանցքային հարցերից մեկը Լեռնային Ղարաբաղի վերամիավորման մասին 1989 թվականի որոշման և Հայաստանի Անկախության հռչակագրի հետ կապված ձևակերպումներն են։
ՔՊ-ում քննարկվում է Սահմանադրության նախաբանում առկա՝ Անկախության հռչակագրին վերաբերող դրույթի փոփոխության և Ղարաբաղի վերամիավորման մասին որոշման հետ կապված հիշատակումից հրաժարվելու հարցը։
Թե ինչ վերջնական ձևակերպումներ կառաջարկվեն և ինչ հիմնավորումներով, այս պահին հստակ չէ։ Սակայն հարցի քաղաքական նշանակությունը դժվար է անտեսել, քանի որ խոսքը վերաբերում է Հայաստանի պետականության հիմնադրույթներին և դրանց արտացոլմանը երկրի մայր օրենքում։
«Ժողովուրդ»-ի աղբյուրների փոխանցմամբ՝ ՔՊ վարչության քննարկումների մյուս կարևոր ուղղությունը դատական համակարգն է։
Ըստ մեր տեղեկությունների՝ նախատեսվում է անդրադառնալ դատական համակարգի վերաբերյալ սահմանադրական դրույթների էական փոփոխություններին։ Քննարկվող հարցերից է նաև երդվյալ ատենակալների ինստիտուտի ներդրումը, որի կողմնակիցներից է վարչապետ Նիկոլ Փաշինյանը։
Երդվյալ ատենակալների ինստիտուտի ներդրման դեպքում քաղաքացիները կարող են օրենքով սահմանված կարգով մասնակցել որոշ քրեական գործերով արդարադատության իրականացմանը։ Սակայն այս պահին պարզ չէ, թե ինչ մոդել է առաջարկվելու, որ գործերի վրա այն կտարածվի և ինչ լիազորություններ են նախատեսվելու երդվյալ ատենակալների համար։
Հետևաբար, առաջիկա քննարկումներում կարևոր է լինելու ոչ միայն ինստիտուտի ներդրման գաղափարը, այլև դրա կիրառման կոնկրետ մեխանիզմների սահմանումը։
«Ժողովուրդ» օրաթերթի աղբյուրների փոխանցմամբ՝ ՔՊ վարչության փակ քննարկումների ընթացքում անդրադարձ է կատարվել նաև Հայ Առաքելական եկեղեցուն վերաբերող սահմանադրական դրույթներին։
Մեր տեղեկություններով՝ այս պահին քննարկվող մոտեցմամբ՝ գործող Սահմանադրության մեջ եկեղեցուն վերաբերող ձևակերպումները, ըստ իշխանական շրջանակներում քննարկվող գնահատականի, համահունչ են իրենց քաղաքական վարքագծին։ Առայժմ, սակայն, հստակ չէ՝ արդյոք այս հատվածում նախատեսվում են կոնկրետ փոփոխություններ, թե հարցը քննարկվում է այլ դրույթների համատեքստում։
Այս թեման հատկապես ուշագրավ է պետություն-եկեղեցի հարաբերությունների շուրջ վերջին տարիներին ծավալված հանրային և քաղաքական քննարկումների ֆոնին։ Այնուամենայնիվ, մինչև նախագծի վերջնական տարբերակի հրապարակումը հնարավոր չէ պնդել, որ եկեղեցուն վերաբերող դրույթների փոփոխության վերաբերյալ որոշում արդեն կայացվել է։
«Ժողովուրդ» օրաթերթի՝ Կառավարությանը մոտ կանգնած աղբյուրների փոխանցմամբ՝ չի բացառվում, որ սահմանադրական փոփոխությունների նախագիծը մինչև տարեվերջ ներկայացվի հանրային քննարկման։
Հետո կարող են մեկնարկել նաև ընդդիմադիր քաղաքական ուժերի հետ բանակցությունները՝ սահմանադրական փոփոխությունների շուրջ հնարավոր համաձայնություններ ձևավորելու նպատակով։
Այս սցենարի իրականացման դեպքում առաջիկա ամիսները կարող են վճռորոշ լինել նոր Սահմանադրության բովանդակության, դրա շուրջ քաղաքական ուժերի դիրքորոշումների և հանրային քննարկման օրակարգի ձևավորման տեսանկյունից։
Առայժմ ՔՊ վարչության փակ նիստերում քննարկվող առաջարկները վերջնական որոշումներ չեն։ Սակայն, մեր աղբյուրների փոխանցմամբ՝ իշխանությունը ցանկանում է նախագծի առանցքային դրույթների վերաբերյալ սեփական դիրքորոշումը հստակեցնել նախքան այն հանրային քննարկման ներկայացնելը։
Հետևեք մեզ Facebook-ում