Վիեննայի միջազգային փառատոնի շուրջ նոր զարգացումներ. WOFA-ի կազմակերպչական կոմիտեն հրատապ նիստ է գումարել

«Արցախյան մշակույթի պահպանման կենտրոն» ՀԿ-ն երեկ տեղեկացրել էր, որ Համաշխարհային փառատոնների ասոցիացիան (World Festival Association, WOFA) չեղարկել է նոյեմբերին Վիեննայում նախատեսված միջազգային փառատոնին կազմակերպությանն անդամակցող Արցախի ազգային նվագարանների պետական նվագախմբի և «Մենք ենք մեր սարերը» երգի-պարի պետական համույթի մասնակցության պաշտոնական հրավերը։ Միջամտել են մի շարք դեսպանատներ, որոնք Արցախի մշակութային համույքներին որակել են «վտանգավոր»։

Այսօր «Արցախյան մշակույթի պահպանման կենտրոն» ՀԿ-ն հրապարակել է Համաշխարհային փառատոնային ասոցիացիայի (WOFA) պաշտոնական գրությունը՝ Վիեննայի միջազգային փառատոնին արցախյան մշակութային համույթների մասնակցության հարցի վերաբերյալ․

«Գրության համաձայն՝ որոշ դիվանագիտական ներկայացուցիչների արտահայտած մտահոգությունների հիման վրա առաջարկվել է չեղարկել մեր համույթների մասնակցության հրավերը։

Առանձնապես մտահոգիչ է պաշտոնական գրության մեջ տեղ գտած այն ձևակերպումը, ըստ որի՝ «Արցախյան մշակույթի պահպանման կենտրոն» ՀԿ-ն ենթադրաբար ներգրավված է «անջատողական գործունեության» մեջ։

Մինչդեռ պաշտոնական գրությունը չի պարունակում որևէ փաստական հիմնավորում, որը կհաստատեր նման պնդումը։

Թեև կազմակերպիչը նախապես խոստացել էր պաշտոնապես պարզաբանել, թե կոնկրետ որ երկրների դիվանագիտական ներկայացուցիչներից են ստացվել այդ մտահոգությունները, մինչ այս պահը մեզ համապատասխան տեղեկություն չի տրամադրվել։

Միաժամանակ, WOFA-ի նախագահ Զորան Ստրեժովսկին անձնական նամակագրությամբ հայտնել էր, որ, ի նշան մեզ աջակցության, պատրաստ է նույնիսկ առաջարկել չեղարկել ամբողջ փառատոնը։

Այսօր՝ հոկտեմբերի 24-ին, ստեղծված իրավիճակի կապակցությամբ WOFA-ի կազմակերպչական կոմիտեն հրատապ նիստ է գումարել։ Նիստի արդյունքների և ընդունված որոշումների մասին կհայտնենք լրացուցիչ։

Մենք անընդունելի ենք համարում մշակութային կազմակերպության հասցեին նման լուրջ պնդումների ներկայացումը՝ առանց դրանց փաստական հիմքերը ներկայացնելու։

Ստեղծված իրավիճակը դուրս է մեկ փառատոնի շրջանակներից և առնչվում է մշակութային իրավունքների պաշտպանությանը, ինչպես նաև միջազգային մշակութային համագործակցության ազատությանը»։