Մեր պայքարն արդար է ու անսակարկ, իսկ գիտակցումը, որ մտավորականությունը մեզ հետ է` առավել անկոտրում է դարձնում մեր կամքը. Անդրանիկ Թևանյան

Երևանի ավագանու «Մայր Հայաստան» խմբակցության անդամ, մշակույթի գործիչ Սամվել Հարոյանը գրել է.
«Հարգելի՜ հայրենակիցներ, սիրով ներկայացնում եմ Անդրանիկ Թևանյանի խոսքը` ուղղված մտավորականությանը. «Ուրախությամբ ընթերցեցի հայրենի մտավորականության ստվար խմբի` ինձ և մյուս քաղբանտարկյալներին սատարող արդեն երկրորդ հրապարակային կոչը։ Մենք մազաչափ անգամ չենք ընկճվում մեր հանդեպ իրականացվող քաղաքական բռի ու ցինիկ հաշվեհարդարից, քանզի մեր պայքարն արդար է ու անսակարկ, իսկ գիտակցումը, որ մտավորականությունը մեզ հետ է` առավել անկոտրում է դարձնում մեր կամքը և մոտալուտ հաղթանակի հանդեպ հավատը։
Ի՞նչը կարող է ավելի մխիթարական ու գոտեպնդող լինել, քան այն, որ վաստակաշատ մարդկանց մեր պատկառելի բանակը անտարբեր չէ երկրում ահագնացող անիրավությունների նկատմամբ և պարբերաբար իր ձայնն է բարձրացնում հանուն արդարության, հանուն ժողովրդավար Հայաստանի։
Իմ և մյուս քաղբանտարկյալների անունից խորին երախտագիտություն եմ հայտնում սատարող կոչին միացած և միացող գործիչներին և նախաձեռնող խմբին` ի դեմս մշակույթի գործիչ Սամվել Հարոյանի, ում միջոցով փոխանցում եմ շնորհակալանքի խոսքս։

Թանկագի՜ն հայրենակիցներ, կասկած չունեմ, որ մոտ է այս քաղաքական ֆարսի վախճանը, որն առավել շոշափելի է դառնալու բռնության հանդեպ ձեր անհաշտ կեցվածքի շնորհիվ։ Մեր պայքարն արդար է ու աննահանջ։ Ազատությո՜ւն բոլոր քաղբանտարկյալներին և անկոտրում կորով քաղաքական հողի վրա հալածվողներին»։