Երկրային ուղին լրել է Հայաստանի վաստակավոր նկարիչ Վլադիմիր Աբրոյանը

Այսօր, 87 տարեկան հասակում երկրային ուղին լրել է Հայաստանի վաստակավոր նկարիչ, հայտնի ծաղրանկարիչ Վլադիմիր Աբրոյանը՝ շատերիս սիրելի «քեռի Վովան»:
Վլադիմիր Աբրոյանը տասնամյակներ շարունակ աշխատակցել է հայկական տարբեր պարբերականների, որոնց էջերը զարդարվել են նրա ինքնատիպ և միշտ սուր և խիտ ասելիքով առանձնացող ծաղրանկարներով: 

Վլադիմիր Աբրոյանը ճանաչված է ոչ միայն սեփական հայրենիքում. հայ ծաղրանկարչի  ինքնակենսագրությունը, դիմանկարն ու ծաղրանկարներից յոթը զետեղված են Թուրինի Հումորի միջազգային կենտրոնի «Ծաղրանկարի միջազգային հանրագիտարանում»։ Վլադիմիր Աբրոյանի աշխատանքները տեղ են գտել նաև Գաբրովոյի «Ծաղրանկարի համաշխարհային անթոլոգիայում»։
Երկար տարիներ աշխատակցել է «Ոզնի երգիծաթերթին», «Գոլոս Արմենիի» թերթին։ Մասնակցել է ցուցահանդեսների Կանադայում, Ֆրանսիայում, Անգլիայում, Բրազիլիայում, Կուբայում, Հոլանդիայում։

Բացի հայկական տպագիր լրատվամիջոցներից, Վլադիմիր Աբրոյանի աշխատանքները տպագրվել են նաև  նախկին ԽՍՀՄ-ի մի շարք ամսագրերում ու թերթերում, այդ թվում՝ «Կրոկոդիլ», «Նեդելյա», «Օգոնյոկ», «Սմենա», «Սովետսկի սոյուզ», «Moscow News»-ը, «Լիտերատուրնայա գազետա», «Սովետսկի սպորտ», «Ֆուտբոլ» հայտնի պարբերականներում, նաև ԳԴՀ-ի, Ռումինիայի, Բուլղարիայի, Ֆրանսիայի, Լիբանանի ամսագրերում:
--
«Ժամ.ամ»-ի խմբագրակազմը վշտակցում է Վլադիմիր Աբրոյանի ընտանիքին, հարազատներին ու մերձավորներին: Այսօր կյանքից հեռացավ մի մարդ, որ ուղղակիորեն լուսավոր հետագիծ է թողել ոչ միայն արվեստի ու նկարչության ասպարեզում, որի նվիրյալն էր, այլև՝ բոլոր նրանց սրտերում և հիշողության մեջ, ովքեր իր հետ աշխատելու, համագործակցելու կամ պարզապես հաղորդակցվելու երջանկությունն են ունեցել: