Ոչ մի դեպքում չպետք է թույլ տրվի Ամուլսարի շահագործումը, մենք կորցնում ենք Ջերմուկը, Սևանը. Նազելի Վարդանյան

«Ամուլսարի հանքը բազմաթիվ ռիսկեր ունի»,- Ամուլսարի շահագործման դեմ բողոքի ակցիայի ժամանակ ասաց էկոլոգ-իրավաբան Նազելի Վարդանյանը։

Նա նշեց, որ դեռևս 2012 թվականին Սևանի հանձնաժողովը 4 հիմնական կետ է նշել, մնացած բոլոր փորձագետներն էլ հաստատել են.

«1․ սեյսմիկ գոտի է 10 բալանոց,

2․ մեծությամբ 2-րդ սողանքային տարածքն է Հայաստանում,

3․ թթվային դրենաժի վտանգն է, որը հնարավոր չէ կառավարել,

4․ ռադիացիոն բարձր վտանգն է»։

Վարդանյանն ընդգծեց, որ սրանք այն ռիսկերն են, որոնք չեն կարող փոխվել և կառավարվել. «Նրանք, ովքեր ասում են՝ պետք է կառավարվի, հիմքեր ունեն, նոր տեխնոլոգիաներ... չկան նման տեխնոլոգիաներ, որ սեյսմիկան, սողանքները, ռադացիան, թթվային դրենաժը կարողանան կառավարել կամ կանխել։

Սա մեծ աղետ է»,-ասաց Վարդանյանը։

Ըստ բնապահան-իրավաբանի, ոչ մի դեպքում չի կարելի թույլ տալ հանքարդյունաբերությունը Ջերմուկում։ 

«Բեռնի կոնվենցիան մեր դիմումի համաձայն որոշում է կայացրել՝  անհապաղ դադարեցնել շինարարությունն ու հանքարդյունաբերությունը Ամուլարում, նշանակել նոր փորձաքննություն, առանց փորձաքննական եզրակացության հնարավոր չէ հանքարդյունաբերությունը, դա անօրինական գործունեություն է։ Մեր կառավարությունը COP17-ից առաջ արհամարհում է  միջազգային կազմակերպության պահանջը։ Այսպես ձեռնոց է նետում միջազգային հանրությանը»,- ասաց Ն.Վարդանյանը։

Նա նշեց, որ ոչ մի դեպքում չպետք է թույլ տրվի հանքարդյունաբերությունը Ամուլսարում. «Մենք կորցնում ենք Ջերմուկը, Սևանը։ Բոլոր փորձագետներն ասել են՝ ջրերը կեղոտվելու են,  դուք 500 տարի միլիարդներն էլ ծախսեք, չեք վերականգնելու։ Մենք երկիր ենք կորցնում։

Ամուլսարը հանք չի դառնալու, Ամուլսարը սար է մնալու»։ 
Աղբյուրը` Panorama.am