ԱՐՏԱՎԱՆՈՒՄ ԿԱՅԱՑԱՎ «ART@VAN» ՁԻԵՐԻ ԼԵՌՆԱՅԻՆ ՄՐՑԱՎԱԶՔՆ ՈՒ ԲԵՐՔԻ ՏՈՆԸ

Վայոց Ձորի բարձրադիր Արտավան բնակավայրում տեղի ունեցավ տարածաշրջանի ամենասպասված ու կոլորիտային իրադարձություններից մեկը՝ «Art@Van» ձիերի լեռնային մրցավազքը և բերքի տոնը: Միջոցառումը, թեպետ առաջին անգամ էր կազմակերպվել, բայց և կարողացավ համախմբել  հարյուրավոր հյուրերի, լեռնային սպորտի սիրահարների և տեղացիների՝ վերածվելով իսկական ազգային տոնախմբության:

14․4 կիլոմետր՝ լեռնային բարդ արահետներով

Միջոցառման առանցքային իրադարձությունը, թերևս, ձիերի լեռնային մրցավազքն էր: Արտավանի դպրոցի հետնամասից մեկնարկած 14.4 կմ երկարությամբ բարդ ու զառիթափ երթուղին, որն ուներ շուրջ 721 մետր բարձրության տարբերություն, հաղթահարելու էին դուրս եկել 25 տոկուն հեծյալներ իրենց երիվարներով։

Լեռնային դժվարին պայմաններում մրցավազքը պահանջում էր ոչ միայն հեծյալների վարպետություն, այլև ձիերի բացառիկ դիմացկունություն: Թեև մրցավազքի վերջնագծում կրքերը բավականին թեժացան, և մասնակիցներից մի քանի հեծյալներ սկսեցին վիճել, թե ով է իրականում առաջինը հատել եզրագիծը, փորձառու մրցավարների արագ ու պրոֆեսիոնալ միջամտության շնորհիվ վեճը հարթվեց, և արդարությունն ու սպորտային ոգին հաղթանակեցին:

Պարգևատրումն ու լավագույնները

Մրցութային ամփոփիչ փուլում առաջին երեք պատվավոր տեղերը զբաղեցրած հեծյալներն արժանացան դրամական խոշոր մրցանակների:

Կազմակերպիչների կողմից հատուկ ուշադրության արժանացան նաև ամենաերիտասարդ մասնակիցները․ երկու պատանի հեծյալներ ստացան խրախուսական նվերներ՝ ապագա հաղթանակներին ընդառաջ:

Տոնավաճառ, ավանդական «Կառշմ» և ազգային երգ ու պար

Քանի դեռ ձիավորները հաղթահարում էին լեռնային արահետները, Արտավանում եռում էր տոնական կյանքը:

Գյուղի աշակերտներն ու ծնողները ներկայացրել էին տեղական բերքի ու բարիքների ճոխ տոնավաճառ: Հյուրերին առաջարկվում էր անվճար հյուրասիրություն՝ ուլի խաշլամա, արտավանյան ավանդական «Կառշմ», «Պաղսկեր», լեռնային ուրցով ու մասուրով թեյեր, գաթա և տեղական այլ համեղ ուտեստներ:

Մշակութային հատվածն ուղեկցվեց Վայք համայնքի և Արտավանի մշակութային խմբերի ու դպրոցականների ելույթներով։ Հնչեցին ազգային երգեր, կատարվեցին «Իշխանաց պար», «Գյովնդ», «Վեր-վերի», «Փափուռի» և «Էրզրումի շորոր» ավանդական խմբապարերը։

Ամենակարևոր ձեռքբերումը․ 200 երեխաների անմոռանալի օրը

Միջոցառման ամենաջերմ ու կարևոր ձեռքբերումը դարձավ ավելի քան 200 երեխաների ոգևորությունն ու ժպիտները: Փոքրիկները հնարավորություն ունեցան հատուկ առանձնացված գոտում ձի քշել, փորձել իրենց ուժերն ու դիպուկությունը նետ ու աղեղով կրակելիս, ծանոթանալ միմյանց հետ և միասնական շուրջպարի բռնվել:

Տոնն ավարտվեց բարձր տրամադրությամբ, երգ ու պարով՝ թողնելով անմոռանալի տպավորություններ ինչպես տեղացիների, այնպես էլ Արտավան ժամանած բազմաթիվ հյուրերի սրտերում:

«Էկո-մեդիա» լրագրողական ցանցի հիմնադիր Նարինե Կիրակոսյան

Տեսանյութը՝ Նարինե Կիրակոսյանի յութուբյան էջից