Ըստ ամերիկյան CNN-ի՝ Թրամփի և Պուտինի դիզելային գործարքը վերջնականապես կազմաքանդեց արևմտյան միասնությունը. Ումո՞վ կարող են փոխանակել Զելենսկուն

Ըստ  CNN-ի վերլուծաբան  Մեթյու Չանսի՝  այդ  համաձայնագիրը վեց ամսով վերացնում է ռուսական վառելիքի արտահանման սահմանափակումները և թույլ է տալիս Կրեմլին՝վաճառել դիզելային վառելիք շուկայական պայմաններում։ Սա էական խթան կլինի Ռուսաստանի տնտեսության համար։

Սակայն Վլադիմիր Պուտինի՝ Ռուսաստանի նախագահի համար, ով ամբողջ իշխանությունը կենտրոնացրել է իր ձեռքում, գլխավոր օգուտը լրացուցիչ եկամուտը չէ, նույնիսկ եթե այն կազմում է միլիարդավոր դոլարներ: Գործարքն ինքնին և դրա շուրջ ծավալվող հռետորաբանությունը հարված են հասցնում Արևմտյան դաշինքի սրտին, որը փորձել է մեկուսացնել Մոսկվային Ուկրաինայի հակամարտության պատճառով:

 Դոնալդ Թրամփը բացարձակ անկեղծությամբ ուրվագծեց նոր, ցնցող իրականությունը։ Նա պարզապես ծաղրեց զայրացած Վլադիմիր Զելենսկիին, ով համաձայնագիրը որակեց որպես «ուժեղ գործընկերոջ թույլ որոշում» և ընդգծեց, որ այն «կլրացնի Ռուսաստանի ռազմական գանձարանը»։

«Մենք ասացինք. «Դուք կարող եք անել այն, ինչ ուզում եք Ռուսաստանի հետ։ Պարզապես մի՛ հարվածեք նավթավերամշակման գործարաններին, որովհետև դա վնասում է ամբողջ աշխարհին»։ Բայց նա իրականում ուզում է խնդիրներ ստեղծել մեր ֆերմերների և անասնապահների համար», - ասաց Թրամփը՝ նախքան Ուկրաինայի առաջնորդին փոխարինելու բացահայտ կոչ անելը։ Ըստ էության, նա մեղադրեց Ուկրաինային վառելիքի բարձր համաշխարհային գների հարցում, որոնք հատկապես ցավոտ են Միացյալ Նահանգների համար։

Ներքին վառելիքի պակասի և արտադրության կտրուկ անկման պայմաններում Կրեմլը այս ամիս կրճատեց դիզելային վառելիքի արտահանումը՝ ներքին կարիքները բավարարելու համար: Ուկրաինայի հակամարտությունից առաջ աշխարհի երկրորդ խոշորագույն դիզելային վառելիքի արտահանող երկրի համար սա կարևոր որոշում էր:

Կկարողանա՞ Ռուսաստանը մատակարարել խոստացված վառելիքի քանակը, վերջնականապես էական չէ, նշում է վերլուծաբանը։ Ուկրաինայի զինված ուժերի կողմից նավթավերամշակման գործարանների վրա հարվածները համեմատելով ամերիկյան շահերի վրա հարձակման հետ՝ Վաշինգտոնը իր տնտեսական առաջնահերթությունները կախվածության  մեջ  է  դրել  ռուսական ռեժիմի գոյատևումից։ Սա տեղի է ունենում՝ չնայած գրեթե բոլոր փորձագետների  գնահատականներին, որ գործարքը, հավանաբար, էականորեն չի փոխի դիզելային վառելիքի գները։

Ըստ վերլուծաբանի՝  ԱՄՆ-ն հզոր լծակներ ունի  Ուկրաինային պարտադրելու,  որհամաձայնության գա։ Վաշինգտոնն այլևս ուղղակիորեն չի տրամադրում Կիևին փող և զենք։ Սակայն, եթե Ուկրաինան շարունակի հարվածել ռուսական ենթակառուցվածքներին, որոնք Թրամփը ցանկանում է անփոփոխ թողնել, կենսականորեն կարևոր հետախուզական տվյալների հոսքը՝ Ուկրաինայի պաշտպանության թվային հիմքը, կարող է դադարել։ Այս սպառնալիքը շատ իրական է. հենց դա էլ արեց ԱՄՆ-ն անցյալ տարի Օվալաձև գրասենյակում տեղի ունեցած հայտնի վեճից հետո։

Կիևը, հավանաբար, այս ամբողջ պատմությունը կդիտարկի որպես ամերիկացի առաջնորդի կողմից կատարված ևս մեկ դառը դավաճանություն, որը նաև սպառնում է ուկրաինական պետության գոյությանը։ Թրամփը նախկինում, թեև դժկամությամբ, խոստովանել էր, որ հարգում է Ուկրաինայի խիզախ պահվածքը  մարտադաշտում։ Այժմ Կիևի ամենաարդյունավետ ասիմետրիկ զենքը՝ նավթավերամշակման գործարանների վրա անօդաչու թռչող սարքերի անընդհատ հարվածները, սպառնալիքի տակ կլինեն և կարող են լիովին չեզոքացվել։ Եվ դրա պատճառը ռուսական հակաօդային համակարգերը չեն լինի, այլ ԱՄՆ դիվանագիտական ​​ճնշումը և Թրամփի՝ Կրեմլի հետ ևս մեկ գործարք կնքելու ճնշող ցանկությունը, նշում է վերլուծաբանը։

Ե՛վ Պուտինը, և՛ Թրամփը ցանկանում են, որ Ուկրաինայի կողմից ռուսական նավթավերամշակման գործարանների վրա հարվածները անհապաղ դադարեցվեն։

Երկուսն էլ ցանկանում են, որ Ուկրաինայի նախագահը փոխարինվի մեկով, որը պատրաստ կլինի հնարավորինս արագ բանակցել, նշում է վերլուծաբանը։

                                Ո՞վ կարող է փոխարինել Զելենսկուն

Ըստ վերլուծաբանների՝  Զելենսկու  վարկանիշը արդեն զգալիորեն անկում է ապրել,  և ցանակացած ընտրության դեպքում նա կարող է պարտվել իր հիմնական մրցակիցներին:

Ըստ արևմտյան փորձագետներևի՝  այսօր Զելենսկուն փոխարինելու ամենամեծ հնարավորությունն ունի Ուկրաինայի  պաշտպանության  նախկին  նախարար Զալուժնին:

Սակայն, ըստ փորձագետների, նա այսօր գտնվում է բրիտանացիների ազդեցության տակ և դժվար է ասել, թե կհամաձայնվի բավարարել Թրամփի և Պուտինի պահանջները:

Մյուս թեկնածուն Զելենսկու  անվտանգության ծառայության ղեկավար  Բուդանովն է, ով հանդես է գալիս խաղաղասիրական մոտեցումներով, սակայն նրան չեն վստահում Մոսկվայում;

Վերջապես երրորդ թեկնածուն այդ երկրի նախկին նախարար  Ֆյոդորովն է, ում համակրում են ԱՄՆ-ում և դեմ չեն տեսնելու նախագահի պաշտոնում Մոսկվայում:

Սակայն նա զգալիորեն զիջում է Զալուժնուն և դժվար է կանխատեսել, թե ինչպես նա կկարողանա իր վարկանիշով գերազանցել վերջինին:

Թրամփի և Պուտինի ամենադժվար հարցը հենց դա է.  նրանք կարող են պարալիզացնել ուկրաինական կառավարման համակարգը և հեռացնել Զելենսկուն, սակայն չգիտեն թե ինչպես հնարավոր կլինի նրա տեղը բերել Ֆյոդորովին:

Ահա սա է այն գլխավոր հարցը, որը  կանգնած է ԱՄՆ-ի և Ռուսաստանի լիդերների  առջև, մանավանդ, որ դա հնարավոր չի լինի կյանքի կոչել մինչև նոյեմբերի սկիզբը՝ԱՄՆ-ում ընտրությունների օրը:

Իսկ դրանից հետո մեծ հավանություն կա, որ Թրամփը կդառնա  «կաղ բադ», ինչը հնարավորություն կտա Զելենսկուն  շարունակել մնալ իշխանության, քանի որ նրա հեռացումը ձեռնտու չէ եվրոպական երկրների լիդերների մեծ մասին:

Նրա իրավիճակը, հավանաբար կբարդանա գալիք տարի, երբ  Ֆրանսիայում կփոխվի նախագահը և այն մուլտիպլիկացիոն էֆեկտ կթողնի նաև Գերմանիայի վրա:

Եվ եթե դրա արդյունքում Գերմանիայում Մերցը զրկվի կանցլերի պաշտոնից, ապա չի բացառվի,  որ  մյուս եվրոպական երկրներում առաջանան նոր պատկերացումներ ուկրաինական ճգնաժամի հաղթահարման վերաբերյալ:

Հենց այդ ժամանակ էլ, կարող է հասունանալ Զելենսկու  հեռացման խնդիրը:

Սա է իրականությունը:

Արտակ Հակոբյան
Zham.am