Ո՞րն է «Արևելյան Անատոլիա» գրելու պատճառը. ինչ-որ մեկին կամ թուրքերին հաճոյանա՞լը
Վաչե Սարգսյանը գրում է. «Ֆեյսբուքյան հրապարակումներից մեկից և դրա մեկնաբանություններից պարզ դարձավ, որ Հայաստանի պատմության թանգարանում ներկայումս ցուցադրվում է մի իր՝ հավանաբար ուրարտական տիպի գոտի, որի բացատրության համար նշված է հետևյալը. 《Գոտի պատկերազարդ՝ Ք. ա. 9-6-րդ դար, հայտնաբերման վայրը՝ անհայտ, Արևելյան Անատոլիա, Թուրքիա, բրոնզ, Նախապատմության և վաղ պատմության թանգարան》:
Երևի այս առարկան բերվել է Գերմանիայից և ցուցադրվում է թանգարանում ներկայումս բացված ցուցադրությունում:
Ժամանակին նույնիսկ Բրիտանական թանգարանը, որտեղ ուրարտական իրերը ներկայացված էին Անատոլիա անունը կրող բաժնում, հայրենասեր հայերի բողոքներից հետո վերափոխվեց և դարձավ Անատոլիա և ՈՒրարտու:
Հիմա շատ տարօրինակ է, թե ինչպե՞ս է Հայաստանի մայր թանգարանում տեղ գտել նման բացատրություն: Մանավանդ, որ թեման այդքան զգայուն է հայերի համար:
Արևելյան Անատոլիան քաղաքական եզրույթ է, որը լայնորեն կիրառվում է թուրքական պետության կողմից:
Արդյոք հնարավո՞ր չէր այդ, մեղմ ասած, ոչ հայամետ տերմինի փոխարեն գրել, օրինակ, Փոքր Ասիա կամ միայն նշել՝ ներկայիս Թուրքիա:
Մանավանդ, որ բացատրությունում նշված է, որ գոտու հայտնաբերման վայրը անհայտ է: Այսինքն թուրքանպաստ աշխարհագրական տերմին է վերագրվում մի իրի, որի գտնվելու վայրն էլ հայտնի չի:
Այդ դեպքում, ո՞րն է Արևելյան Անատոլիա գրելու պատճառը: Ինչ-որ մեկին կամ թուրքերին հաճոյանա՞լը:
Ի վերջո, պետք է գիտակցել, որ խոսքը ոչ թե Թուրքիայի, այլ Հայաստանի պատմության թանգարանի մասին է…»:
Հետևեք մեզ Facebook-ում