COP17-ի գովազդային արշավի համար կառավարությունը 452 միլիոն դրամով կնքել է 3 պայմանագիր, 3-ն էլ նույն կազմակերպության հետ. Լենա Մաթևոսյան
«Մենք դեմ չենք COP17-ի կամ այլ միջազգային համաժողովի իրականացմանը Հայաստանում։ Մենք դեմ ենք, որ այսպիսի միջոցառումները վերածվեն պետական գումարների անթափանցիկ ծախսման կամ մսխման»,- Ազգային ժողովի արտահերթ նիստի ժամանակ ունեցած ելույթում ասաց ԱԺ «Ուժեղ Հայաստան» խմբակցության պատգամավոր Լենա Մաթևոսյանը։
Նա հայտնեց, որ մոտ 452 միլիոն դրամ ծախսվում է COP17-ի գովազդային արշավի համար՝ կնքելով 3 պայմանագիր։
«Ամեն պայմանագրում մոտ 40 աշխատակից է առանձնացված, որոնք աշխատանքային հստակ բնութագրեր ունես։ Դնում ես աշխատանքային բնութագրերն իրար կողք, պարզվում է՝ նույն աշխատանքային բնութագրեր էին։ Այսինքն, հնարավոր էր մեկ պայմանագիր ստորագրել 40 աշխատակցով, իրականացնել աշխատանքները, բայց, իհարկե, ո՞նց կարելի էր, պետք էր 3 պայմանագիր ստորագրել աստղաբաշխական թվերով ստորագրել ու հովազդային արշավ իրականացնել»,- ասաց ընդդիմադիր ուժի ներկայացուցիչը։
Լ. Մաթևոսյանի խոսքով, պարզվել է նաև, որ շրջակա միջավայրի նախարարությունն առանց որևէ մրցույթի որոշել է այդ 3 պայմանագիրը կնքել նույն կազմակերպության հետ. «Ոչ միայն գովազդային պայմանագրերն են նույն կազմակերպության հետ կնքել, նաև կապի, հաղորդակցության, տրանսպորտի հարցերի բոլոր պայմանագրերը։
Հարց է առաջանում՝ ինչպե՞ս է տեղի ունեցել այս ընտրությունը, ո՞ր մրցակցային արժեքի համար է այս կազմակերպության հետ պայմանագրեր կնքվել»։
Հիշեցնենք՝ Ազգային ժողովի արտահերթ նիստում քննարկվում է «Հայաստանի Հանրապետության կառավարության և Կենսաբանական բազմազանության մասին կոնվենցիայի քարտուղարության միջև կողմերի համաժողովի տասնյոթերորդ հանդիպման, որպես Կարթագենյան արձանագրության կողմերի հանդիպում հանդես եկող կողմերի համաժողովի քսաներորդ հանդիպման և որպես Նագոյայի արձանագրության կողմերի հանդիպում հանդես եկող կողմերի համաժողովի վեցերորդ հանդիպման անցկացման վերաբերյալ» համաձայնագիրը վավերացնելու մասին նախագիծը։
Հոկտեմբերի 19–30-ը Հայաստանը կհյուրընկալի ՄԱԿ-ի «Կենսաբանական բազմազանության մասին» կոնվենցիայի Կողմերի 17-րդ համաժողովը (CBD COP17)։
Աղբյուրը` Panorama.am

