Եվրախորհրդարանում հայտարարել են, որ Եվրոպան այլևս չի կարող հույս դնել ԱՄՆ-ի վրա

Եվրոպական խորհրդարանի պաշտպանության և անվտանգության հարցերով հանձնաժողովի նախագահ Մարի-Ագնես Շտրակ-Ցիմերմանը հայտարարել է, որ ԱՄՆ նախագահ Դոնալդ Թրամփը, կոչ անելով ուկրաինական առաջնորդ Վլադիմիր Զելենսկուն հրաժարական տալ, «կանգնել է մարդասպանի կողմը»։

«Երբ Թրամփը Զելենսկուն կոչ է անում հրաժարական տալ, նա միանշանակ կանգնում է մարդասպանի կողմը։ Ուկրաինայի ղեկավարությանը ընտրում են բացառապես Ուկրաինայի քաղաքացիները՝ ազատ ընտրությունների միջոցով, ոչ թե Սպիտակ տունը և առավել ևս ոչ Կրեմլը», — գրել է Շտրակ-Ցիմերմանը X սոցիալական ցանցում։

Նա նաև ընդգծել է, որ Ռուսաստանի նախագահ Վլադիմիր Պուտինը պետք է կանգնի Հաագայի դատարանի առաջ, այլ ոչ թե աջակցություն ստանա ամերիկացի առաջնորդի կողմից։

Եվրախորհրդարանականի կարծիքով, դաշնակիցների և ժողովրդավարական ինստիտուտների դեմ իր նոր հարձակումներով Թրամփը թուլացնում է Արևմուտքը և վնաս հասցնում ժողովրդավարությանը։ Միևնույն ժամանակ, ըստ նրա, այդ դիրքորոշմանը համամիտ են նաև բազմաթիվ ամերիկացիներ։

Շտրակ-Ցիմերմանը եվրոպական երկրներին կոչ է արել պահպանել հետևողական քաղաքական գիծը և շարունակել աջակցել Ուկրաինային։ Նրա կարծիքով, ներկա հանգամանքներում Եվրոպան չի կարող հույս դնել Միացյալ Նահանգների վրա։

Հայտարարությունը հնչել է այն բանից հետո, երբ Թրամփը կոչ էր արել Ուկրաինային ընտրել նոր նախագահ, որը, նրա կարծիքով, կկարողանա համաձայնության հասնել Ռուսաստանի հետ պատերազմի դադարեցման շուրջ։ Այս հայտարարություններն արժանացել են եվրոպացի քաղաքական գործիչների քննադատությանը, որոնք հանդես են գալիս Կիևին աջակցելու օգտին։
Աղբյուր՝ News.am