Թրամփն ամեն օր Իրանին կարող է հաղթել միայն սեփական երևակայության մեջ․ Ռեզայի

Իրանի Ազգային անվտանգության բարձրագույն խորհրդի քարտուղար Մոհսեն Ռեզային հայտարարել է, որ Իրանի նկատմամբ տարած հաղթանակի մասին ԱՄՆ նախագահ Դոնալդ Թրամփի պնդումները բացարձակապես չեն արտացոլում իրական պատկերը։

Ըստ Ռեզայիի՝ Թրամփը կարող է «ամեն օր հաղթել իր երևակայության մեջ», մինչդեռ իրականությունը կերտում են Իրանը, նրա ժողովուրդը, բանակն ու հրթիռները։

«ԱՄՆ-ի պատմության վատագույն նախագահը, շարունակական ձախողումներից հետո, չի դադարում խոսել, և այժմ նրա խոսքերը գերազանցել են նույնիսկ իր իսկ երևակայության սահմանները»,- ուրբաթ օրը X սոցիալական ցանցում գրել է Ռեզային:

«Ձեր երևակայության մեջ դուք կարող եք հաղթել ամեն օր։ Սակայն իրականությունը կերտվում է Իրանի, նրա ժողովրդի, զինվորների ու հրթիռների միջոցով»,- հավելել է նա։

Ռեզայիի այս արձագանքը հաջորդել է Թրամփի այն բազմաթիվ պնդումներին, թե ԱՄՆ-ն արդեն հաղթել է կամ շատ մոտ է Իրանի հետ պատերազմում հաղթանակին։ Հինգշաբթի օրը ամերիկյան նախագահը նշել էր, որ Թեհրանը կապիտուլյացիայի եզրին է, և հակամարտությունը կարող է ավարտվել ԱՄՆ-ի միջանկյալ ընտրություններից անմիջապես հետո։

Դրա հետ մեկտեղ, Թրամփը չի բացառում լայնածավալ ռազմական գործողությունների վերսկսումը։ Reuters գործակալության տվյալներով՝ Վաշինգտոնն ընդլայնում է իր ռազմական ներկայությունը Մերձավոր Արևելքում, իսկ Իրանը պատրաստվում է ամերիկյան հնարավոր նոր հարվածին։

Կողմերի միջև բանակցությունները ևս առայժմ արդյունք չեն տվել։ Ըստ Reuters-ի՝ Իրանը Կատարի միջնորդների միջոցով առաջարկ է փոխանցել, որը նախատեսում է ռազմական գործողությունների դադարեցում, Հորմուզի նեղուցի բացում և պատժամիջոցների չեղարկում, սակայն Թրամփը մերժել է այն։

Հինգշաբթի օրը Թրամփը հայտարարել էր, որ Իրանը պետք է ընդունի Վաշինգտոնի առաջարկած գործարքը. «Նրանք կա՛մ կստորագրեն շատ արդարացի համաձայնագիր, կա՛մ այլևս գոյություն չեն ունենա», — ընդգծել է ԱՄՆ նախագահը։

Նախօրեին Ռեզային նույնպես հերքել էր հակամարտության մոտալուտ ավարտի վերաբերյալ Վաշինգտոնի պնդումները։ Նրա հայտարարությունը հնչում է Վաշինգտոնի և Թեհրանի միջև ինչպես դիվանագիտական շփումների, այնպես էլ լայնածավալ ռազմական գործողությունների հնարավոր վերսկսման շուրջ պահպանվող անորոշության ֆոնին։