ԽՍՀՄ վերջին տարիների ամենահայտնի հեռուստախաբեբաներից Կաշպիրովսկին է մահացել, 87 տարեկան հասակում

87 տարեկանում մահացել է խորհրդային հոգեթերապևտ, հիպնոզիստ Անատոլի Կաշպիրովսկին։

Կաշպիրովսկին մեծ համբավ էր ձեռք բերել 1980-ականների վերջին «Հոգեթերապևտ Անատոլի Կաշպիրովսկու առողջապահական սեանսները» հեռուստահաղորդումների շնորհիվ։ Կենտրոնական հեռուստատեսությամբ նա անցկացրել է հոգեթերապիայի և հիպնոսի սեանսներ՝ հայտարարելով էկրանի միջոցով հեռուստադիտողների վիճակի վրա ազդելու հնարավորության մասին։ Նրա հաղորդումները ունենում էին միլիոնավոր հանդիսատես և դարձել էին խորհրդային հեռուստատեսության ամենանշանավոր երևույթներից մեկը։
rosbalt.ru-ն գրում է, որ վերջին տարիներին նա շարունակել է հայտնվել հանրության մեջ՝ անցկացնելով հանդիպումներ և առցանց հրապարակելով «առողջության սեանսներ»:
--
Կաշպիրովսկին, նաև Չումակը դարձան ինչպես գորբաչովյան «պերեստրոյկայի» յուրօրինակ խորհրդանիշը, այնպես էլ՝ միլիոնավոր մարդկանց հեռուստացույցով հիմարացնելու, այսինքն՝ զանգվածային ապուշացման վառ դրսևորում: Թվում է, թե՝ աշխարհի ամենից բարձր կրթական ցենզերից մեկն ունեցող երկրում տասնյակ միլիոնավոր մարդիկ այդ հաղորդումների ժամանակ «սոսնձվում» էին հեռուստաէկրաններին, միամտորեն հավատալով, թե այդպես կարելի է ձերբազատվել լեղապարկի քարից կամ թեկուզ՝ բուժել գաստրիտը, էլ չենք ասում՝ ճաղատի փոխարեն վերստին գանգրահերվելու մեծ հույսեր ունեցողների մասին:  
Չնայած, մե՞նք է, որ պիտի զարմանանք. մի քանի տասնյակ իշխանավորների խմբակը մի քանի միլիոն մարդու համոզում է, թե նրանց հայրենիքի մի մասը «վզի թոկ» էր և այն թշնամուն հանձնելը իրականում մեծ նվաճում է...