Ալիևը Հայաստանի նախկին ղեկավարներին անվանել է ռազմական հանցագործներ, իսկ Փաշինյանին՝ մեղավոր Ադրբեջանի առջև. Ի՞նչ է դա նշանակում

Այսօր, Բաքվում, Հեյդար Ալիևի կենտրոնում տեղի է ունենում «Նոր Ադրբեջան» կուսակցության (ՆԱԿ) 8-րդ համագումարը, որտեղ արդեն իր ելույթվ հանդես է եկել Իլհամ Ալիևը:

Ըստ նրա՝  էներգետիկ ռեսուրսներով հարուստ Ադրբեջանն այսօր դարձել է շատ լուրջ աշխարհաքաղաքական և անվտանգության գործոն։

Ադրբեջանը աշխարհի այն քիչ երկրներից մեկն է, որը արտադրում, արդյունահանում և արտահանում է բոլոր տեսակի էներգետիկ ռեսուրսներ՝ հում նավթ, նավթամթերք, բնական գազ, էլեկտրաէներգիա, նավթաքիմիական արտադրանք և պարարտանյութեր, որոնց արտադրության հիմնական աղբյուրը նույնպես էներգիան է, նշել է Ադրբեջանի ղեկավարը։

«Մենք մեր արտաքին քաղաքականությունը կառուցել ենք և պետք է շարունակենք այնպես, որ ոչ ոք չմիջամտի մեր գործերին։ Մեզ ոչ մեկի օգնությունը պետք չէ, ոչ էլ որևէ մեկի հովանավորությունը», - ընդգծել է Ալիևը, հավանաբար ակնարկելով Մոսկվային:

Նշելով, որ Ադրբեջանը վերջին պատերազմում միայնակ է հաղթանակ տարել, Ալիևը փորձում է ակնարկել արդեն իր  «ավագ եղբորը»՝ Թուրքիային, որ ինքն Էրդողանին պարտք չէ, թեև վերջինս մի անգամ չէ, որ հայտարարել է, որ հենց իր ջանքերով հաջողվեց Ադրբեջանին հաղթանակ տանել Հայաստանի նկատմամբ:

Խոսելով Հայաստանի մասին, Ալիևը հայտարարեց, թե  թեև  այս պահին հաստատված է խաղաղություն, սակայն հաշվի առնելով անցյալ պատմությունը, Ադրբեջանը պիտի շարունակի ավելացնել իր ռազմական հնարավորությունները:

Հայաստանի մասին խոսելիս՝  Ալիևը հերթական անգամ արդրադարձավ Հայաստանի ներկա և նախկին ղեկավարներին:

Ըստ նրա՝  Հայաստանը միշտ է տարածքային պահանջներով հանդես եկել Ադրբեջանի նկատմամբ:

Մեղքը չի կարող բարդվել միայն Հայաստանի նախկին ղեկավարության վրա։ Այնուամենայնիվ, Հայաստանի բոլոր նախկին ղեկավարները ռազմական հանցագործներ են և պետք է ստանան իրենց արժանի պատիժը։

«Ներկայիս Հայաստանի իշխանությունները տարածքային պահանջներ են ներկայացրել մեր նկատմամբ, փորձել են վիրավորել ադրբեջանական ժողովրդին և իրենց անտեղի ու անքաղաքավարի հայտարարություններով վիրավորել են ադրբեջանական ժողովրդի արժանապատվությունը», - ընդգծել է պետության ղեկավարը՝ նշելով, որ  երբեք չպետք է մոռանանք դրա մասին։

Այս հայտարարությամբ, Ալիևը փորձում է հասկացնել Փաշինյանին, որ թեև ինքը  Փաշինյանին նախկին Հայաստանի ղեկավարներից տարբերում է, սակայն իր հանդեպ Ադրբեջանը  նույնպես հաշիվներ ունի և դա երբեք չի մոռացվելու:

Այսինքն, Ալիևը փորձում է հասկացնել Փաշինյանին, որ վերջինս  «պարտք է»  լինելու իրեն հավերժորեն և այդ տեսանկյունից նրա պահանջների շարքը Փաշինյանի հանդեպ չի ավարտվելու, քանի որ Փաշինյանը  նույնպես ժամանակին Ադրբեջանի հանդեպ վատ է վերաբերվել և պիտի հատուցի դրա համար:

Այն,  որ Ադրբեջանն երբեք չեր մոռանալու հակամարտության պատմությունը, ոչ ոք չէր կասկածում:

Պարզապես հետաքրքիր է, որ հենց այս պահին նա որոշել է կրկին հիշեցնել Փաշինյանին, որ բոլոր տեսակի պայմանավորվածություններից բացի, Փաշինյանը  հավերժորեն պարտք է մնալու իրեն,  և ինքը դա երբեք չի մոռանալու:

Սա է իրականությունը:

Արտակ Հակոբյան
Zham.am