ՌՈՒՍԱԿԱՆ ՌԱԶՄԱԲԱԶԱՆ` ՈՐՊԵՍ ՀԱՅԱՍՏԱՆԻ ԱՆՎՏԱՆԳԱՅԻՆ ՀԱՄԱԿԱՐԳԻ ԱՆԲԱԺԱՆԵԼԻ ՄԱՍ

Սերգեյ Սարգսյանը նկատում է. «Հայտնի է, որ պետության անվտանգության համակարգի երկու գլխավոր հենասյուներն են բանակը և տնտեսությունը։ Միաժամանակ, պետությունները հաճախ իրենց անվտանգությունն ապահովելու նպատակով համագործակցում են այլ երկրների, հատկապես՝ ռազմական և տնտեսական մեծ հնարավորություններ ունեցող պետությունների հետ։

Այդ համագործակցության հիմքում փոխադարձ վստահությունն ու դաշնակցային հարաբերություններն են, իսկ դրա գործնական դրսևորումներից մեկը կարող է լինել մեկ պետության տարածքում մեկ այլ պետության ռազմաբազայի առկայությունը, որ《գլխին տեր》կամ《ֆեոդալ》ունենալու մասին չէ։

Օրինակ՝ ԱՄՆ-ն ռազմական բազաներ կամ մշտական ռազմական ներկայություն ունի մի քանի տասնյակ երկրներում՝ Գերմանիայում, Թուրքիայում, Հարավային Կորեայում, Ճապոնիայում, Ռումինիայում, Լեհաստանում և այլուր (հուսամ չկա կարծիք, որ սրանով Գերմանիան կամ Թուրքիան ինքնիշխան չեն)։ Նման ռազմական ներկայություն տարբեր երկրներում ունեն նաև Մեծ Բրիտանիան, Թուրքիան, Ֆրանսիան և այլ պետություններ։

Ռուսաստանն ունի համեմատաբար ավելի քիչ արտերկրյա ռազմաբազաներ, որոնք հիմնականում տեղակայված են իր համար ռազմավարական նշանակություն ունեցող տարածաշրջաններում։ Դրանցից մեկը Հայաստանն է։

Հայաստանում ռուսական 102-րդ ռազմաբազայի ներկայությունը տարիներ շարունակ հանդիսացել է ոչ միայն հայ-ռուսական ռազմական համագործակցության, այլև Հայաստանի անվտանգային համակարգի կարևոր բաղադրիչ։ Այն ունի նշանակություն ոչ միայն Հայաստանի, այլև Հարավային Կովկասում ուժերի հավասարակշռության և անվտանգության տեսանկյունից և դրա հեռացման թեմայի արծարծումը հրապարակային մակարդակում ոչ թե առաջացնում է հարցեր, այլ հաստատում է նախկինում առկա բոլոր կասկածները կամ վարկածները։

Ըստ էության, անցած 8 տարիները տվել են բոլոր պատասխանները Ն.Փ.-ի իշխանության գործողությունների մոտիվացիայի և նպատակի մասով և այս մասով նույնպես ակնհայտ է։ Հնարավոր չէ լուրջ քննարկել կամ հարցադրումներ բարձրացնել, թե ինչով են ՔՊ-ական իշխանությունները պատրաստվում փոխարինել ռուսական ռազմաբազան կամ արդյոք անվտանգային հարցերն առաջնային են իրենց համար։ Ուղղակի մի կարևոր փաստ ևս մեկ անգամ պետք է արձանագրել` ռուսական ռազմաբազայի դուրսբերումը կնշանակի, որ Ռուսաստանը այլև Հայաստանը չի դիտարկում որպես դաշնակցային պետություն` իրենից բխող հայտնի և կանխատեսելի բացասական հետևանքներով։

Հ.Գ. ԿԲ նախագահը հայտարարել է, որ գազի գնի թանկացումը ապոկալիպտիկ հետևանքներ կառաջացնի Հայաստանի համար։ Պատրա՞ստ է Հայաստանը այս անվտանգային և տնտեսական փորձություններին»։