Բաքվի դիրքորոշումը Հայաստանի Սահմանադրության վերաբերյալ անփոփոխ է մնում՝ պետք է այն փոփոխվի. Բայրամով

Ադրբեջանը տարբեր ազդակներ է ստանում Հայաստանից՝ հանրաքվե անցկացնելու և սահմանադրությունը փոփոխելու վերաբերյալ, սակայն Բաքվի դիրքորոշումը մնում է անփոփոխ. խաղաղության համաձայնագրի ստորագրման համար անհրաժեշտ են սահմանադրական փոփոխություններ։ Այս մասին հայտարարել է Ադրբեջանի ԱԳ նախարար Ջեյհուն Բայրամովը։

Բայրամովը հիշեցրել է, որ 2025 թվականի օգոստոսին Վաշինգտոնում ստորագրված համատեղ հայտարարության համաձայն՝ խաղաղության համաձայնագրի նախաստորագրումից հետո պետք է ձեռնարկվեն գործընթացն ավարտելու համար անհրաժեշտ քայլերը։

«Դրանցից մեկը Հայաստանում հանրաքվեի անցկացումն է և սահմանադրության փոփոխությունը։ Մենք տարբեր ազդակներ ենք ստանում Հայաստանից այս հարցի վերաբերյալ։ Վարչապետ Նիկոլ Փաշինյանը նույնպես նոր հայտարարություններ է արել ծրագրերի վերաբերյալ։ Մեր դիրքորոշումը մնում է անփոփոխ։ Այս քայլերը անհրաժեշտ են խաղաղության համաձայնագրի ստորագրման համար», - ասել է Ադրբեջանի ԱԳ նախարարը։

Ջեյհուն Բայրամովը հայտարարել է, որ առաջիկայում հանդիպելու է հայաստանցի գործընկերոջ՝ Արարատ Միրզոյանի հետ։ Ադրբեջանական ԶԼՄ-ների փոխանցմամբ, նա նշել է, որ երկու երկրների արտաքին գործերի նախարարությունների միջև շփումները կանոնավոր բնույթ են կրում։

«Մեր վերջին հանդիպումը կայացել է Բիշքեկում։ Հենց այդ ժամանակ մենք պայմանավորվեցինք երկկողմ հանդիպումները շարունակելու անհրաժեշտության շուրջ»,- ասել է Բայրամովը։

Նա ընդգծել է, որ սահմանազատման գործընթացը նույնպես կանոնավոր քննարկումների առարկա է։

Ադրբեջանցի պաշտոնյան նաև նշել է՝ TRIPP նախագծի շուրջ հիմնական բանակցություններն ընթանում են ԱՄՆ-ի և Հայաստանի միջև, սակայն դրա իրականացումն անհնար է առանց Ադրբեջանի մասնակցության։

«TRIPP-ի վերաբերյալ հիմնական բանակցություններն ընթանում են ԱՄՆ-ի և Հայաստանի միջև, և դա բնական է։ Միևնույն ժամանակ, ամերիկյան գործընկերները պարբերաբար տեղեկացնում են ադրբեջանական կողմին, քանի որ նախագիծը չի կարող իրականացվել առանց Ադրբեջանի մասնակցության», - ասել է նա։
Աղբյուրը` Panorama.am