Պարոնայք պետական պատասխանատուներ, մի քիչ թասիբ ունեցեք, բոլորիս պատվի խնդիրն է. Դավիթ Իշխանյանը Բաքվի բանտից ուղերձ է հղել
Արցախի Հանրապետության ԱԺ նախագահ Դավիթ Իշխանյանը Բաքվի բանտից ուղերձ է հղել ՝ Հայաստանի Մարդու իրավունքների պաշտպան Անահիտ Մանասյանին հավիրելով Բաքու։
«Հրավիրում եմ ձեզ Ադրբեջանի Ումբակի քրեակատարողական հիմնարկ՝ մեզ հետ հանդիպման։ Կարծում եմ՝ ներկա քաղաքական հարաբերությունների շրջանակներում դա լրիվ տեղավորվում է, որևէ բարդություն չպետք է լինի, գաք ու ծանոթանաք խաղաղության դատավարության դատապարտյալներին։
Սպասում ենք։
Հայաստանի իշխանության պատկան մարմիններին ու պատասխանատուներին ասելիքս այս պահին հետևյալն է՝ պահանջեք և ստացեք, ինչպես ադրբեջանական մամուլն է ձևակերպում, ծագումով հայ, Հայաստանի Հանրապետության քաղաքացիների դատավճիռները և ինքներդ քննարկեք՝ կա՞ն հայկական պետականությանն ու պետությանը, հա ժողովրդի իրավունքներին ու պատվին անդրադառնող հարցեր։
Մենք տալիս ենք հիմնավորված, փաստարկված, արժանի պատասխաններ, բացատրություններ, մի կասկածեք։ Այդ դատավարությունը Ադրբեջանի դատական համակարգի համար վեր է ածվել կատարյալ ֆիասկոյի։ Դատարանում դրա մասին բարձրաձայնել ենք, այլ հարց է, թե ինչպես է կախյալ ու գրաքննող մամուլը դա ներկայացնում։
Պարոնա՛յք պետական պատասխանատուներ, Ադրբեջանում գտնվող 19 անձինք Հայաստանի Հանրապետության անձնագիր կրող անհատներ են։ Իմացած եղեք՝ դա մեր անհատական պատվի խնդիրը չէ, դա բոլորիս պատվի խնդիրն է, առավել ևս՝ ձեր։ Ժողովրդական լեզվով ասած՝ մի քիչ թասիբ ունեցեք և տեր կանգնեք, օրինակ վերցրեք օտարներից։
Պինդ եղեք, ժողովուրդ»։
Հետևեք մեզ Facebook-ում