Երկիր Ծիրանին «կռիվ» է գցել Ելք-ի ավագանու անդամների մեջ

Երեւանի ավագանու «Ելք» խմբակցությունում տարաձայնություններ կան՝ անդամները համաձայնության չեն գալիս։ Բանն այն է, որ դաշինքի անդամ երկու կուսակցությունները՝ «Քաղաքացիական պայմանագիր» եւ «Լուսավոր Հայաստան» կուսակցությունները կողմ են «Երկիր Ծիրանի» խմբակցության այն նախագծին, որով առաջարկում են Երեւանում տեղադրել Մարտի 1-ի զոհերի հիշատակը հավերժացնող արձան, սակայն «Հանրապետություն» կուսակցության 4 ավագանու անդամները դեմ են։

Բանն այն է, որ «Հանրապետություն» կուսակցությունը «ԵԾ»-ի առաջարկում միտում է տեսնում, նրանց խոսքով՝ «Երկիր Ծիրանին» Մարտի 1-ին տեղի ունեցած իրադարձությունները պայմանավորում է դեռ 1996 թվականով, երբ այդ ժամանակ պաշտոնյա էր Վազգեն Սարգսյանը։ «ԵԾ»-ն իր իր հիմնավորման մեջ նշել է․ «Հայ ազգը նորանկախ Հայաստանի բռնակալությունից առաջին սարսափելի հարվածը ստացավ 1995-1996 թվականներին, երբ կեղծվեցին ՀՀ Սահմանադրության ընդունման հանրաքվեն, խորհրդարանական և նախագահական ընտրությունների արդյունքները և հայտարարվեց քաղաքական իշխանության ձևավորման համար այլևս կիրառվելիք հետևյալ բանաձևը՝ «Եթե ընդդիմությունը նույնիսկ հավաքի 100 տոկոսանոց ձայն, նրան իշխանություն չի տրվելու»:

Hraparak.am-ի հետ զրույցում «Հանրապետություն» կուսակցության ավագանու անդամ Անի Խաչատրյանը նշեց․ ««Երկիրն Ծիրանի» կուսակցությունը զուգահեռ նախագծեր է բերել՝ Վազգեն Սարգսյանի անվան փողոցի մի հատվածը անվանափոխելու եւ Մարտի 1-ի զոհերի հիշատակը հավերժացնող արձան տեղադրելու վերաբերյալ։ Զարուհու արածը մենք անբարո ենք համարում, քանի որ Մարտի 1-ը ինքը շեղում է դեպի 1996 թիվ՝ Վազգենի եւ Լեւոնի կողմ, իսկ «Հանրապետություն» կուսակցությունը դեմ է քվեարկելու այս նախագծին, որովհետեւ Քոչարյանի մասնակցությունը Մարտի 1-ին փոքրացնում են այս նախագծով, իսկ ինքը առաջին պատասխանատուն է դրա համար։ «Երկիր Ծիրանին» ասում է, թե 1996 թվականից է հիմքը դրվել Մարտի 1-ի։ «Հանրապետությունը» ձեւավորել է դիրքորոշում եւ այդ դիրքորոշումը ներկայացրել է խմբակցությանը»։

Ավելի մանրամասն՝ Hraparak.am-ում: