Դատարանը փորձում է մեզ բոլորիս եւ Գագիկ Ծառուկյանին համոզի՝ մածունը սեւ է. Աբովյան

Եթե ինչ-որ մեկին թվում է, որ մարդիկ ընկճվելու են, կոտրվելու են շարունակական հետապնդումների հետևանքով, չարաչար սխալվում են: Այս մասին, այսօր՝ սեպտեմբերի 4–ին, դատարանի բակում հայտարարեց ԲՀԿ անդամ Արման Աբովյանը՝ անդրադառնալով ԲՀԿ առաջնորդ Գագիկ Ծառուկյանի կալանքի ժամկետը երկու ամսով երկարաձգելու որոշմանը։

«Հանուն արդարության, հանուն ազատության պայքարը  շարունակվում է: Հանկարծ ոչ մեկը չընկճվի, ոչ մեկը գլուխը չկախի։  ես գիտեմ՝ ծանր է, բոլորիս էլ ծանր է, յուրաքանչյուր նորմալ մարդու համար ծանր է, երբ անմեղ մարդուն առանց որևէ պատճառների պահում են ճաղերի ետևում։ Պարոն Ծառուկյան, գիտենք դուք չեք կոտրվի, չեք ընկճվի, նայում ենք ձեզ և մեր մեջ այդ ուժը արթնանում է»,–ասաց նա։ Ներկաները սկսեցին վանկարկել՝ «ազատություն», «Ծառուկյան»։

Արման Աբովյանը շարունակեց. «Մարդ որ պատվով է, մարդ որ թասիբով է, դրա համար շնորհակալություն չեն ասում, բայց ես ասում եմ, որովհետև այսօր, ցավոք, ապրում ենք այն ժամանակներում, երբ հայ մարդը, պատվով մարդը պիտի կռիվ տա, որ իր պատիվը ու հայությունը պահպանի»։ Արդեն լրագրողների հետ զրույցում՝ անդրադառնալով Գագիկ Ծառուկյանի նկատմամբ հարուցված քրեական վարությին, նա ասաց. «Ես չգիտեմ՝ դրանց ինչ են արել, որ իրենք սուտ, շինծու ցուցմունքներ են տվել։ Մարդիկ, ովքեր տվել են ցուցմունք, արդեն իսկ Իրանում մեղավոր էին կարգվել, և այստեղ շատ կարևոր է հասկանալ, որ այն, ինչ մենք տեսնում ենք, սա չի վերաբերվում միայն Գագիկ Ծառուկյանին և իր թիմակիցներին, սա վերաբերում է Հայաստանի Հանրապետության բոլոր քաղաքացիներին, նույնիսկ այն մարդկանց, որոնք միգուցե սատարում են այս իշխանությանը։

Եթե քաղաքացու հանդեպ ապօրինություն է կատարվում, բոլորի դեմ է կատարվելու, վաղ թե ուշ։

Ապօրինի, շինծու գործ է, և սա նաև հետևանք է այն վրեժի, որին մենք ականատես ենք։ Ես այլ բացատրություն չեմ կարող գտնել, որովհետև ըստ էության ունենք մի իրավիճակ, երբ դատական համակարգի ներկայացուցիչը փորձում է մեզ բոլորիս և Գագիկ Ծառուկյանին ապացուցել, որ մածունը սև է, բայց այդպես չի լինում»։

Հիշեցնենք, որ Գագիկ Ծառուկյանը հուլիսի 7-ին կալանավորվել է առանձնապես խոշոր չափերով խարդախություն և փողերի լվացում կատարելու մեղադրանքներով: Ավելի ուշ ԲՀԿ առաջնորդի նկատմամբ նոր հանրային քրեական հետապնդում է հարուցվել՝ հարկերից խուսափելու հոդվածով:

Հուլիսի 6-ին, մոտ 12 ժամ Քննչական կոմիտեի քննիչները խուզարկում էին, գործարար Գագիկ Ծառուկյանի առանձնատունը և նրա հետ փոխկապակցված 70-ից ավելի այլ հասցեներ։ Խուզարկություններից հետո ԱԱԾ աշխատակիցները Գագիկ Ծառուկյանին իր առանձնատնից ձերբակալել էին՝ նրան գետնին տապալելով:

Ըստ ՔԿ-ի՝ տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթներից մեկով փաստական տվյալներ են ձեռք բերվել այն մասին, որ Գագիկ Ծառուկյանի կազմակերպմամբ մի շարք անձինք 2022-2024 թվականների ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում:

Քննչական կոմիտեի փոխանցմամբ՝ Գագիկ Ծառուկյանը կազմակերպել և ղեկավարել է հանցավոր խումբ, որը Իրան-Հայաստան լոգիստիկ կապեր ստեղծելու պատրվակով, խաբեությամբ ու փաստաթղթեր կեղծելով, իրանական ընկերություններից հափշտակել է 52 միավոր տրանսպորտ, տեխնիկա և ապրանքներ՝ պատճառելով շուրջ 22 միլիոն դոլարի վնաս։

Այնուհետև, ըստ նախաքննական մարմնի, Ծառուկյանը կազմակերպել է այդ հանցավոր ճանապարհով ստացված գույքի և գումարների լվացումը՝ դրանք սեփական ընկերությունների օրինական շրջանառությանը միախառնելով։ Ինքը՝ գործարարը, մեղադրանքը չի ընդունում՝ այն որակելով կեղծիք։

Ծառուկյանի փաստաբանները ևս պնդում են, որ մեղադրանքն անհիմն է:
Աղբյուր՝ News.am