Փաշինյանի իշխանության շրջանի մուլտիսեփականատեր Նարեկ Նալբանդյանը ձեռք է բերել նաևՀրազդանի ցեմենտի գործարանը

«88» սուպերմարկետների ցանցի սեփականատեր Նարեկ Նալբանդյանը ձեռք է բերել Հրազդանի ցեմենտի գործարանը: Այս մասին Սպուտնիկ Արմենիային տեղեկացրել են գործարարին պատկանող «Eighty eight» հյուրանոցային համալիրի էջից:

«Տարիներ շարունակ չգործող ցեմենտի գործարանը նոր սեփականատեր ունի. այն ձեռք է բերել գործարար Նարեկ Նալբանդյանը: Գործարանի համար սկսվում է զարգացման նոր փուլ։ Հնարավորինս սեղմ ժամկետում նախատեսվում է մեկնարկել լայնածավալ ներդրումային ծրագիր»,- նշված է հյուրանոցի սոցիալական էջում։

Այս ձեռնարկությունը Հայաստանում ցեմենտի 2 խոշոր գործարաններից մեկն է։ Վերջին 20 տարիներին գործարանը մի քանի տարբեր սեփականատերեր է ունեցել։ 2001 թվականին այն սեփականաշնորհել է «Միկա Արմենիա» ընկերության նախագահ Միխայիլ Բաղդասարովը և վերանվանել «Միկա–Ցեմենտ» ՓԲԸ: 2016 թվականին կուտակված պարտքերի պատճառով ձեռնարկությունը փոխանցվել է ՎՏԲ-Հայաստան բանկին, որը դարձել է գործարանի լիիրավ սեփականատեր: 2017 թվականի վերջին գործարանը ձեռք է բերել «Հրազդան ցեմենտ Քորփորեյշն» ընկերությունը: 2022 թվականին սկսվել է սնանկության գործընթացը։

Նշենք , որ գործարար Նարեկ Նալբանդյանին են պատկանում
1 «Նալբանդյան» օղիները,
2 Ծաղկաձորի «Գոլդեն Փելես» հյուրանոցը,
3 Սևանի «Հայրապետ» հյուրանոցային համալիրը,
4 Հայաստանի նախկին վարչապետ Հովիկ Աբրահամյանի նախկին առանձնատունը Հաղթանակի զբոսայգու հարևանությամբ,
5 Մեղրաձորի ոսկի-բազմամետաղների հանքավայրը շահագործող «Մեղրաձոր գոլդ» ՍՊԸ-ի բաժնետոմսերի մի մասը,
6 Նոր Հաճնի «Շողակն» ադամանդի գործարանը,
7 «Շիրակ» թռչնաֆաբրիկան,
8 ալրաղացներ Մասիս և Արտաշատ քաղաքներում,
9 տրանսպորտային ընկերություններ,
10 անասնակերերի ու ալյուրի արտադրությամբ զբաղվող «Նալբանդյան ալյուր» ընկերությունը,
11 «Գյումրի հավկիթ» և «Նոր Լուսակերտ հավկիթ» ընկերությունները,
12 «Ծիրան», «Օազիս» և «Էյթի Էյթ» (88) սուպերմարկետների ցանցերը,
13 ավտոպարկ՝ ավելի քան 200 բեռնափոխադրող մեքենայով,
14 «AquaYan» խմելու ջրի գործարանը և այլն։

Մամուլը պարբերաբար գրում է նրա և իշխող «Քաղաքացիական պայմանագիր» կուսակցության սերտ կապերի մասին։
--
Իհարկե, բոլորն էլ հասկանում են, որ Նալբանդյանը այս ամենի սեփականատեր է դարձել բացառապես օրինական միջոցներով, միմիայն արդար ճանապարհով ու քրտինքով, զուտ բիզնես տաղանդով: Հասկանալի է նաև, որ փաշինյանական իշխանությանն սպասարկող հակակոռուպցիոն մարմինը նրան երբեք չի անհանգստացնի: 
Հայաստանում միայն ընդդիմադիրներն իրավունք չունեն սեփականություն ունենալու: