Հստակ է, որ Պուտինը երեկ հայտարարեց Հայատանում իշխանափոխության ռուսական վերջնախաղի մեկնարկը. Բալյան

Փաշինյան-Պուտին հանդիպման ժամանակ ծավալված քննարկման վերլուծության հիմքով մի քանի կարևոր արձանագրումներ է կատարել քաղաքական վերլուծաբան Վարդան Բալյանը։

Նա նշել է.

«ՌԴ նախագահը փաստացի հրապարակավ մերժեց հայկական երկաթուղու կառավարումը երրորդ` Հայաստանի և Ռուսաստանի համար փոխընդունելի երկրի վաճառելու հայկական կողմի առաջարկ֊պահանջը։ Ավելին, ռուսները հստակ դիրքորոշում են ձևակերպել` կատարել անհրաժեշտ ներդրումներ ԹՐԻՓ նախագծի շրջանակներում երկաթուղային ենթակառուցվածքի զարգացման ոլորտում բեռնափոխադրումների որոշակի ծավալի ապահովման պայմանով։ Սա ինքնին հատկանշական հանգամանք է, քանի որ ուղղակիորեն փոխկապակցվում է Ադրբեջանի պահանջով ՀՀ նոր սահմանադրության ընդունման և Ադրբեջանի հետ խաղաղության պայմանագրի ստորագրման գործընթացի հետ։

Ավելին, Ռուսաստանը բաց տեքստով ասում է, որ ԹՐԻՓ-ի իրականացումն առանց իրենց մասնակցության տեխնիկապես անհնարին է։ ԵԱՏՄ-ԵՄ ընտրության պահանջը վերջնականապես ձևակերպվեց որպես վերջնագիր։ Ու որքան էլ Փաշինյանը հայտարարի, թե լավ հանդիպում էր ու ինքը գոհ է արդյունքներից, իրականությունը միանգամայն այլ է։

Հստակ է, որ Պուտինը երեկ հայտարարեց Հայատանում իշխանափոխության ռուսական վերջնախաղի մեկնարկը։ Կարծում եմ, նույնքան վերջնագրային են լինելու աշխարհաքաղաքական և տարածաշրջանային մյուս կենտրոնների պահանջները ուղղված Հայաստանին։ Ամեն գնով վերարտադրության և միանձնյա իշխանության ձգտող ՔՊԿ-ն արդեն որերորդ անգամ մեր երկիրը կանգնեցնում է ծանրագույն գին ունեցող ընտրության առջև` անկախ արդյունքներից։

Պետական որոշումների ընդունման մոնոպոլիան, որ, ըստ էության, անխուսափելիորեն հանգեցնում է մեր երկրում պետական իշխանության ապապետականցման և որևէ կլիկի կողմից սեփականաշնորհման, ցավոք սրտի, ճակատագրական հետևանքներ է ունենում մեր պետության ու ժողովրդի համար»։