Սերժ Սարգսյանի նկատմամբ կիրառվել է բացակայելու արգելք խափանման միջոցը

ՀՀ երրորդ նախագահ Սերժ Սարգսյանի նկատմամբ կիրառվել է բացակայելու արգելք խափանման միջոցը: Այս մասին Panorama.am-ին հայտնեց Սերժ Սարգսյանի պաշտպան Ամրամ Մակինյանը։ 

«Երկրոդ անգամ կիրառվել է բացակայելու արգելքը», -ասաց Ա. Մակինյանը։ 
Հիշեցնենք՝ նախօրիեն Սերժ Սարգսյանը հրավիրվել էր հակակոռուպցիոն կոմիտե։ 
Հիշեցնենք ՀՀ երկրորդ նախագահ Ռոբերտ Քոչարյանի գործի վերաբերյալ նախօրեին դատախազությունը հաղորդագրություն էր տարածել, որում մասնավորապես ասվում է.

«Դատախազը 2026 թվականի օգոստոսի 24-ին հանրային քրեական հետապնդում է հարուցել Հայաստանի Հանրապետության երկրորդ նախագահ Ռ.Ք.-ի նկատմամբ՝ պաշտոնեական լիազորությունները չարաշահելու (3 դրվագ), առանձնապես խոշոր չափերով կաշառք ստանալու (2 դրվագ) և առանձնապես խոշոր չափերով փողերի լվացում կատարելու համար (4 դրվագ)։ Դատախազը հանրային քրեական հետապնդում է հարուցել ևս 9 անձի նկատմամբ, որոնց թվում են՝ ՀՀ երկրորդ նախագահ Ռ.Ք.-ի որդի Ս.Ք.-ն, ՀՀ պաշտպանության նախկին նախարար Ս.Ս.-ն (Սերժ Սարգսյան), ՀՀ նախկին վարչապետ Ա.Մ.-ն (Անդրանիկ Մարգարյան), Երևանի նախկին քաղաքապետ Գ.Բ.-ն (Գագիկ Բեգլարյան), «Լոկալ Դիվելոփըրզ» ՍՊ ընկերության մասնակից Ս.Մ.-ն (Սամվել Մայրապետյան), ինչպես նաև Կոնդի առանձնատների տնտեսության տնօրենի պաշտոնը զբաղեցրած և շինարարական գործունեություն իրականացնող «Այգեձոր» ՍՊԸ-ն ղեկավարած Ա.Ո.-ն., Ա.Ո.-ի կինն ու երկու դուստրերը»։ 

Հակակոռուպցիոն կոմիտեից հայտնել էին. «Հակակոռուպցիոն կոմիտեում քննվող նույն քրեական վարույթի շրջանակում 2003 թվականի ապրիլի 18-ին ընդունված ՀՀ քրեական օրենսգրքի 308-րդ հոդվածի 2-րդ մասով (համապատասխանում է գործող Քրեական օրենսգրքի 441-րդ հոդվածի 2-րդ մասի 5-րդ կետին) մեղադրանք է ներկայացվել նաև ՀՀ նախկին նախագահ Ս.Ս.-ին»։ 

Սերժ Սարգյանի պաշտպան Ամրամ Մակինյանը առաջադրված մեղադրանքը որակել էր անհեթեթ։ 

«Ես դժվարանում եմ մեղադրանքի վերաբերյալ որևէ մեկնաբանություն ներկայացնել։ Սպասում ենք, թե այս գործն ի՞նչ տրամաբանական ավարտ կունենա (հասկանալի է՝ մի օր կուղարկվի դատարան), և հնարավորություն կունենանք նաև հանրությանը ցույց տալու, թե ի՞նչ անհեթեթության հետ ենք ընդհանրապես մենք առնչվում»,- 168․am-ի հետ զրույցում ասել էր նա։