Ժողովուրդը մեզ ասում է՝ «էդ պիղծ դավաճանը ինչու է դեռ մնում»․ Քոչարյանը՝ Փաշինյանին

Անցած 20 օրերին քննարկումներում շատ էր շոշափվում քաղաքական բանտարկյալների, քաղաքական հետապնդումների թեման ու ՔՊ–ի պատգամավորները հիմնականում ընդդիմանում էին, ասում էին՝ չկա նման բան Հայաստանում, բայց հենց նոր Նիկոլ Փաշինյանի ասածը քաղաքական հետապնդման, պատվեր իջացնելու դասական օրինակներից է դատարանների, քննչականների, մնացածի վրա։ Այս մասին այսօր՝ օգոստոսի 24–ին, ԱԺ–ում հայտարարեց «Հայաստան» խմբակցության պատգամավոր Լևոն Քոչարյանը։

«Եթե երկրի վարչապետը ասում է այս ինչը պետք է նստի, այս ինչը պետք է ունեզրկվի, սա քաղաքական պատվեր է, սա նորմալ չի, սա հակասում է եվրոպական ստանդարտներին, ժողովրդավարությանը, այն ամեն ինչին, ինչի համար դուք պայքարել ու եկել եք։ Բա պոզով-պոչո՞վ է այս պատվերը լինում, ափաշքյարա, օրը ցերեկով այս ամեն ինչը արվում է անընդհատ։

Ի՞նչ է նշանակում՝ ժողովուրդը մեզնից ուզում է այս, ես հավատում եմ, բայց նաև դա ինչի՞ է այդպես, որովհետև տարիներով եղած վատի վրա այնքան մեծ դոզա սուտ եք ավելացրել, բայց ձեզնից էլ պահանջում են, իսկ մեզնից գիտե՞ք ինչ են պահանջում։ Մեզ էլ ասում են՝ Արցախը կործանած, հազարավոր զոհեր բերած, այդ պիղծ դավաճանը ինչի՞ է մինչև հիմա կարողանում լինել այդտեղ»,–ասաց նա։

Նիստը վարող ԱԺ նախագահ Ռուբեն Ռուբինյանը կոչ արեց Քոչարյանին չափավորել խոսքը։ Նա նաև նախազգուշացում հայտարարեց ՔՊ–ական պատգամավոր Վահագն Ալեքսանյանին. «Պիղծ դավաճանը հերդ ա» արտահայտության համար։

Նիկոլ Փաշինյանն արձագանքեց. «Եկեք քաղաքական էմոցիան ճաշակները, գնահատականները թողնենք մի կողմ։ Դուք ինչի՞ եք միլիոնատեր, դուք ինչի՞ հաշվին եք միլիոնատեր։ Ձեր ընտանիքը ինչի՞ հաշվին է միլիոնատեր։ Գնում ես քաղաքի հյուսիս, ձերն ա, գնում ես հարավ՝ ձերն ա, գնում ես արևմուտք՝ ձերն ա։

Լավ, ամեն ինչ դնենք մի կողմ, Դուք 10 տարի եղել եք իշխանություն, ես էլ արդեն ութ տարուց ավել վարչապետ եմ, ես ինչի միլիոնատեր չեմ, դուք ինչի եք միլիոնատեր, բացատրեք ինչի եք միլիոնատեր, այդ ունեցվածքը որտեղի՞ց ձեզ։

Ու դուք ուզում եք ասեք, որ դուք պետք է ՀՀ–ում շարունակեք մնաք միլիոնատե՞ր, դդուք ուզում եք ասեք, որ ձեր միլիոնները պիտի ժառանգեք ձեր երեխաներին, ձեր երեխաներն էլ իրենց երեխաներին։ Ես ձեզ կներեք, ուղիղ ասում եմ, որ չի լինելու այդ բանը։ Ոնց ուզում եք, մեկնաբանեք, և դա ինձ համար քաղաքական խնդիր է, ոչ թե անձնական։

Իմ խնդիրը այն չի, որ ինչ-որ մեկը միլիոնատեր է, իմ խնդիրը այն է, որ ինչ-որ մեկը միլիոնատեր է մեր ժողովրդի հաշվին։ Դուք պիտի հատիկ-հատիկ ամեն ինչը պետք է վերադարձվի Հայաստանի Հանրապետությանը և այո դա իմ քաղաքական առաքելությունն է, պահանջն է և պարտավորությունն է, որ ես ստանձնել եմ ժողովրդի առաջ»։ Լևոն Քոչարյանն արձագանքեց. «Թե ինչը, ում պետք է վերադարձվի, ժողովրդավարական երկրում պիտի որոշի դատարանը, ոչ թե երկրի առաջին դեմքը փաստացի։ Այն, ինչ դուք ասում եք, հակասում է այս ամեն ինչին։

Երբ դուք կանգնում եք երկրի ամենաբարձր ամբիոնում ու ասում եք՝ դու չես կարա ժառանգես, ու զուգահեռ գործ կա դատարանում, սա ուղիղ ճնշում է դատարանի վրա։

Ձեր մոտ կա էլ նախկինի նախկին, էլ մարզպետներ կան, ում հետ կապված այնքան հոդվածներ եք գրել ժամանակին, բայց հիմա ձեր մոտ են ու իրենց հետ կապված դուք խնդիր չունեք, ուրեմն այս ամեն ինչը անձնավորված է, ու եթե իմ սաղ կյանքի իմաստը լիներ ինչ-որ բան ժառանգելը, ես հիմա այստեղ նստած չէի լինի, ես իմ համար հանգիստ ինչ-որ տեղ կլինեի, ունեցվածքը շուտվանից ծախած։ Այնպես որ դա չի այս ամեն ինչի մեջ մոտիվացիան լինելու, իսկ ձեր արածը հետագայում ինձ թվում է քրեական վարույթների նյութ է դառնալու»։

Վարչապետը մեջբերում արեց Նոր Կտակարանից. «Մի դատիր, որ չդատվես, որովհետև ինչ դատով դատես, նույն դատով էլ դատվելու ես։ Հիմա ես ասում եմ՝ այն ինչ որ ես ձեզ ասեցի, ես այո, ձեզ դատում եմ և պատրաստ եմ նույն դատով դատվել»։
Աղբյուր՝ News.am