Ստերի շարք... սա է սրանց պատկերը. Բագրատ Սրբազան

«ՄԱԿ-ի փորձագետները Հայաստանի կառավարությանը 2024 թվականի հունիսի 12-ի դեպքերի և «18 արդարների» գործի մասին հարցադրումներ են ներկայացրել հետևելով մեր՝ իրենց հետ գրագրությանը։ Բավականին սուր հարցադրումներին Հայաստանի կառավարությունը խուսափողական պատասխաններ է տվել»,- ասուլիսում ասաց փաստաբան Հովհաննես Խուդոյանը։

Ըստ նրա, կառավարությունն իր պատասխաններով փորձել է արդարացումներ գտնել մարդու իրավունքների կոպտագույն ոտնահարումներին։

«ՄԱԿ-ի փորձագետները հասկանում են, որ դրանք խեղաթյուրված բնույթ ունեն, մենք էլ մեր հերթին յուրաքանչյուր պատասխանին կանդրադառնանք»,- ասաց փաստաբանը։

Փաստաբան Տաթև Սողոյանն ասաց, որ իրենք պետք է ցույց տանք Հայաստանում իրաավախախտումների,  հանցագործությունների լայնածավալ, պարբերական լինելը։

«Օրինակ, ՄԱԿ-ի փորձագետները հարց են ուղղել հունիսի 12-ի դեպքերից տուժած մարդկանց արդարացի փոխհատուցման մասին։ Կառավարությունից երկար տեքստ են գրել՝ ոստիկանական գվարդիան են բարեփոխել, դատավորներին են վերապատրաստել և այլն։

Կամ մեկ այլ հարցին մոտավորապես հետևյալ պատասխանել են տվել՝ հունիսի 12-ին մենք չէինք բռնություն գործադրում, բռնարարաները ցուցարարներն էին, որպես բռնարարության ամենացայտուն օրինակ ներկայացնում են Բագրատ Սրբազանի խոսքը, գրում են՝ ոստիկաններին կոչ է արել հանել սաղավարտները։ 

Բացում ենք տեսանյութը, ինչ է ասել իրականում Սրբազանը՝ տղաներ, կարիք չկա սաղավարտ կրելու, որովհետև այստեղ ձեզ ոչինչ չի սպառնում, ուղղակի ասում եմ, քանի որ շոգ է սաղավարտների տակ։  Այս ամենը կառավարությունը ներկայացնում է  որպես ապացույց, որ այդ ցուցարարներն են եղել բռնարար»։

Ասուլիսին ներկա Բագրատ Սրբազանն ասաց, որ Նիկոլ Փաշինյանը Ազգային ժողովում այս դրվագի մասին հետևյալն է ասել. «Եպիսկոպոսը  խոսել է, փորձել է ոստիկաններին համոզել, որպեսզի սաղավարտները հանեն, հետո գնացել ու քարանետում է  կազմակերպել։ 

Սա խոսել է ամբիոնից։ Սրա համար դատի ենք տվել, եթե տեսնենք, թե ինչ են ներկայացրել իր պաշտպաններն այդ իմաստով, որ ի նկատի չի ունեցել Բագրատ Սրբազանին, արդյո՞ք միայն ինքն էր այնտեղ հոգևորական։ Նման ստերի շարք։ Վերջում տեսնելով, որ սա չի անցնում, վաղեմության ժամկետով  դատարանը մերժել է։ Սա է սրանց պատկերը»։