Սեպտեմբերից շուրջ 229 փոքր դպրոցներ փակվելու են կամ միավորվելու են. Լիլիթ Գալստյան

«5 տարի շարունակ մանանայի պես  ժողովրդին կերակրել եք դպրոցաշինության ծրագրով՝ խոստանալով 5 տարում կառուցել 300 դպրոց և  500 մանկապարտեզ, սակայն խոստացվածի կեսից պակասը կամ կեսն է իրականացվել»,- ԱԺ-ում ունեցած ելույթում ասաց «Հայաստան» խմբակցության պատգամավոր Լիլիթ Գալստյանը՝ խոսքն ուղղելով ՔՊ-ականներին։

Նա նշեց, որ 2025  թվականի տարեվերջի դրությամբ 300  դպրոց ծրագրի շրջանակում աշխատանքներն ավարտվել են ընդամենը 122-ում, իսկ 500 մանկապարեզ և նախակրթարան ծրագրի շրջանակում՝ 280-ում։

«Կառավարության որոշմամբ, 2026  սեպտեմբերից շուրջ 229  փոքր դպրոցներ փակվելու են կամ միավորվելու են։ Սրանց 55-ը սահմանամերձ դպրոցներ են։ Սա նշանակում է, որ շուրջ 8700 երեխա ստիպված է լինելու դպրոց գնալ այլ բնակավայրում,  անորոշ է մոտ 2000 մանկավարժի և մյուս աշխատակիցների ճակատագիրը»,- ասաց Լ. Գալստյանը։

Նա ընդգծեց, որ ՔՊ-ն կշտապի  «իրենց բնորոշ մանիպուլյացիաների բարձր տաղանդով» հակադարձել իրեն՝  ոչ թե փակում են, այլ օպտիմալացվում է, որպեսզի որակյալ կրթական ծրագրեր մատուցվի։

«Բայց մի՞թե հիմնավորելու կարիք կա, թե սահմանամերձ  գյուղի միակ դպրոցը ինչ  բարոյական, հոգեբանական, հատկապես անվտանգային խնդիրներ է լուծում։ Այս ոչ հեռատես քայլով դուք դատարկում եք գյուղերը, բացում եք երկրի թիկունքը։ Լուծումն ուղղակի աղետալի է»,-ասաց Լ. Գալստյանը։