Հայ առաքելական Սուրբ եկեղեցին դիմացել է շատ մեծ ասպատակումների. Մամիջանյան

«Այս պահին մեր ազգային ամոթն է տեղի ունենում դատարանում։ Խնդրում եմ, որպեսզի մեր համաքաղաքացիները հետևյալ նախադասությունը փորձեն գիտակցել՝ Վեհափառ Հայրապետին Հայաստանի դատարանը փորձում է դատել։ Մեր կաթողիկոսը դատարանում է։ Նման բան եղել է մի անգամ՝ խեղդամահ են արել Սովետական իշխանությունների ժամանակ։ Փաշինյանը դրա՞ն է պատրաստվում»,- Էջմիածնում դատարանի բակում լրագրողների հետ զրույցում նշեց Հայկ Մամիջանյանը։

Նրա խոսքով՝ ստեղծված իրավիճակը քաղաքական պայքարի շրջանակում չէ, այլ վերաբերում է ազգային արժեքներին և ինքնությանը։

«Այստեղ արդեն քաղաքականություն չկա, այստեղ ազգային արժեքներ են, ազգային ինքնությունն է։ Ես վստահ եմ, որ աշխարհում չկա գոնե մի հայ, որը հաշտ է այս ամենի հետ, որ Վեհափառ Հայրապետին դատարան է հրավիրել»,- ասաց Մամիջանյանը։

Նա պնդեց, որ իշխանությունները փորձում են թուլացնել Հայ Առաքելական Սուրբ եկեղեցու դերը։

«Այսպես կոչված իշխանությունը հույս ունի քանդել Հայ Առաքելական Սուրբ եկեղեցին, բայց մեր եկեղեցին դիմացել է շատ ավելի մեծ ասպատակությունների, քան մի խումբ նիկոլականներն են, մի խումբ մարգինալները։ Եկեղեցին միշտ եղել է մեր պաշտպանական վերջին խրամատը, նույնիսկ երբ պետականություն չի եղել»,- նշեց նա։

Խոսելով եկեղեցու և պետության հարաբերությունների մասին՝ Մամիջանյանը նշեց, որ եկեղեցու ներքին հարցերը, իր կարծիքով, չեն կարող կարգավորվել աշխատանքային օրենսգրքով։
Աղբյուրը` Panorama.am