Երկու խմբակցությունները երեկոյան կգնան Մայր Աթոռ՝ Վեհափառից օրհնություն ստանալու. Աննա Գրիգորյան

Խորհրդարանի երկու ընդդիմադիր խմբակցությունները երեկոյան կգնան Մայր Աթոռ Սուրբ Էջմիածին՝ Ամենայն հայոց կաթողիկոս Գարեգին Բ-ի օրհնությունը ստանալու համար։ Այս մասին օգոստոսի 2-ին լրագրողների հետ զրույցում հայտարարել է «Հայաստան» դաշինքի խմբակցության ղեկավար Աննա Գրիգորյանը։

Ըստ նրա, իշխանությունները, 9-րդ գումարման խորհրդարանի առաջին նիստին չհրավիրելով Ամենայն հայոց կաթողիկոսին, անում են այն, ինչ ներառել են նախընտրական ծրագրում։ «Նրանք նախընտրական ծրագրում ներառել էին Ամենայն հայոց կաթողիկոսին հեռացնելու օրակարգը, ուստի տրամաբանական է, որ չէին կարող նրան հրավիրել»,- ընդգծել է խմբակցության ղեկավարը՝ սա համարելով աննախադեպ երևույթ։

Նա նկատել է, որ Ազգային ժողովը օրհնություն չի ստացել։ Ըստ նրա, «Հայաստան» դաշինքը, գալով խորհրդարան, հայտարարել է, որ գլխավոր օրակարգը մնում է ներկայիս իշխանությունների հեռացումը։ Գրիգորյանն Ազգային ժողովն անվանել է հերթական հարթակ, որտեղ դաշինքի ներկայացուցիչները կարող են հնչեցնել իրենց մոտեցումները։ «Շատ մեծ սպասելիքներ չկան, բայց սա մեր դիրքորոշումը հնչեցնելու հերթական հնարավորությունն է։ Մենք պատրաստ ենք ցանկացած մարտահրավերի, պատկերացնում ենք՝ ինչ ենք ուզում ստանալ»,- պարզաբանել է պատգամավորը։

Նա հայտնել է, որ «Ուժեղ Հայաստան» դաշինքի խմբակցության գործընկերների հետ քննարկման ժամանակ հստակեցրել են դիրքորոշումները մի քանի հարցի շուրջ։

««Ուժեղ Հայաստան» դաշինքի խմբակցության գործընկերների հետ գտնվում ենք գործընկերային հարաբերությունների մեջ և պատրաստ ենք տարբեր հարցերի շուրջ քննարկումների, երկու ուժերն էլ դրական են տրամադրված միմյանց նկատմամբ, բայց դա չի նշանակում, թե մենք նույնական դիրքորոշումներ ունենք»,- հավելել է Աննա Գրիգորյանը՝ միաժամանակ բացառելով որևէ սեպարատ պայմանավորվածություն իշխանությունների հետ։