Բայց մի բան չեք կարող վերցնել՝ նրա թողած հետքը. Գագիկ Ծառուկյանի դուստրը՝ հոր ունեցվածքը խլելու մասին

ԲՀԿ առաջնորդ, բարեգործ, քաղբանտարկյալ Գագիկ Ծառուկյանի դուստրը՝ ակնաբույժ Էմմա Ծառուկյանը, անդրադառնալով այս օրերին իր հոր ու նրա ունեցվածքի դեմ կատարվող գործողություններին, սոցիալական ցանցի իր էջում գրել է.

«Հայրս իր անունը պատրաստի չի ստացել, նա այն կառուցել է տարիներով։ Որովհետև երբ մարդու ստեղծածին փորձում են ձեռք տալ, իսկ մարդիկ շարունակում են հիշել նրա արած բարին, հասկանում ես՝ նա իր կյանքի ամենակարևոր հարստությունն արդեն ստեղծել է։

Այն չի բռնագրավվում, չի ջնջվում։ Ես մեծացել եմ՝ տեսնելով, թե ինչպես է հայրս իր կյանքի տարիները, ուժն ու հոգին դրել իր ստեղծածի մեջ։ Եվ այսօր՝ ցավը կորցնելու վախը չէ… ցավն այն է, երբ փորձում են մի ամբողջ կյանքի ստեղծածին վերաբերվել այնպես, կարծես այդ տարիները երբեք չեն եղել։

Կարող եք ձեռք տալ նրա ստեղծածին, դռներ փակել, անուններ փոխել, փորձել մարդուն հեռացնել իր իսկ կառուցածից։
Բայց մի բան չեք կարող վերցնել՝ նրա թողած հետքը։ Որովհետև մարդու ամենամեծ ունեցվածքը ոչ թե այն է, ինչ գրված է թղթի վրա, այլ այն, ինչ գրված է մարդկանց հիշողության մեջ։

Իսկ այդ ստեղծածը ոչ մի որոշմամբ չեն խլում, ոչ մի թղթով չեն ջնջում։ Որովհետև կան բաներ, որոնց սեփականատերը ոչ թե թուղթն է որոշում, այլ ժամանակը, մարդկանց հիշողությունն ու Աստված։

Այս ամենը կատարվում է Աստծո աչքի առաջ։ Ես գիտեմ՝ ինչ գին ունի տարիներով ստեղծածը, գիտեմ ինչ է նշանակում սեփական անունը դարձնել ոչ միայն ազգանուն, այլ պատասխանատվություն։

Երբ հավատում ես Աստծուն, հասկանում ես՝ ճշմարտությունը երբեմն կարող է ուշանալ մարդկանց աչքերում, բայց Աստծո առաջ այն երբեք չի կորչում։ Մի օր այս օրերն էլ անցյալ են դառնալու, այսօրվա աղմուկն էլ է լռելու։

Եվ ժամանակը յուրաքանչյուրին թողնելու է իր արածի կողքին։ Ես հավատում եմ՝ Աստված բացելու է այն դուռը, որը մարդիկ փակեցին, ու հայրս ազատության մեջ շարունակելու է այն ճանապարհը, որի վրա դեռ Աստծուց տրված շատ գործ ունի անելու»։