Հարստացած ՔՊ-ականը. Ռոմանոս Պետրոսյանը 6 ամսում ՀԷՑ-ից ստացել է մոտ 26 մլն դրամ աշխատավարձ

Ռոմանոս Պետրոսյանը հայտարարագրել է համատեղ սեփականության իրավունքով պատկանող 2 բնակարան․ մեկը գտնվում է Կոտայքի մարզի Աբովյան քաղաքում, ձեռք է բերվել 2001-ին, մյուսը՝ Երևանի Արաբկիր վարչական շրջանում, գնել է 2019 թվականին։ Նա նաև հայտարարագրել է 1 հողամաս, որը միանձնյա է տնօրինում, գտնվում է Կոտայքի մարզի Ակունք համայնքում, գնել է 2014 թվականին։ «Փաստինֆոն» է ներկայացնում ՀԷՑ-ի ժամանակավոր կառավարիչ, Պետական վերահսկողական ծառայության նախկին ղեկավար, «Քաղաքացիական պայմանագիր» կուսակցության վարչության անդամ Ռոմանոս Պետրոսյանի 2025 թ-ի տարեկան հայտարարագիրը։

«Պետրոսյանը հայտարարագրել է 2017 թվականի թողարկման BMW մակնիշի ավտոմեքենա, որը գնել է 2023 թվականին։

Տարվա սկզբում նրա բանկային հաշիվներից մեկում եղել է 7 հազար եվրո, որը տարեվերջին զրոյացվել էր, մեկ այլ հաշվին տարվա սկզբին եղել է 7 միլիոն 420 հազար 359 դրամ, որը տարեվերջին արդեն 32 մլն 84 հազար դրամ էր։

Տարվա սկզբում ունեցել է 1 միլիոն 800 հազար դրամ կանխիկ գումար, որը տարեվերջին արդեն 2 միլիոն 350 հազար դրամ էր կազմում։

Տարվա ընթացքում Պետրոսյանի եկամուտները կազմել են ավելի քան 39 մլն 743 հազար դրամ։

Հատկանշական է, որ Պետրոսյանը ՀԷՑ-ի ժամանակավոր կառավարիչ է նշանակվել 2025 թ-ի հուլիսի 18-ին, և 6 ամսվա ընթացքում ՀԷՑ-ից նա ստացել է ավելի քան 25 մլն 981 հազար դրամ աշխատավարձ, այն դեպքում, երբ տարվա առաջին կիսամյակում Պետական վերահսկողական ծառայության պետի պաշտոնում նրա ստացած աշխատավարձը կազմել է շուրջ 10 մլն 650 հազար դրամ։

Նշենք, որ ևս 2 մլն 574 հազար դրամ ստացել է Ֆինանսների նախարարությունից, 328 հազար դրամ՝ «Ամերիաբանկից», ևս 208 հազար դրամ՝ ԴԱՀԿ Կոտայքի մարզային բաժնից։

Տարեվերջին նրա վարկային պարտավորությունների մայր գումարը կազմել է 24 մլն 18 հազար դրամ»,-հայտնում է «Փաստինֆոն»։