«Փյունիկն» ու «Ալաշկերտը» դուրս մնացին պայքարից, իսկ «Նոան» անցավ հաջորդ փուլ

Հայկական ֆուտբոլային թիմերից երկուսը՝ «Փյունիկն» ու «Ալաշկերտը» դուրս մնացին Կոնֆերենցիաների լիգայի պայքարից: «Փյունիկը» այդպես էլ չկարողացավ գրավել հունգարական «Դեբրեցենի» դարպասը: Գոլազուրկ ոչ ոքի, որը ձեռնտու էր հունգարական թիմին, քանի որ առաջին խաղում հաղթել էին 1-0 հաշվով: Այնպես չէ, որ «Փյունիկը» խաղի ընթացքում շանսեր չունեցավ, բայց ունենք այն, ինչ ունենք: Ավելի ճիշտ, արդեն չունենք: 

«Ալաշկերտը» ռումինական «Կլուժի» հետ երևանյան հանդիպումն ավարտել էր 1-1 հաշվով: Բայց հյուրընկալվելիս պարտվեց 0-3: Ըստ որում, հանդիպման մեծ մասը «Ալաշկերտը» անցկացրեց 10 ֆուտբոլիստով, քանի որ արդեն 12-րդ րոպեին, «վերջին հույսի» խախտման համար հայկական թիմի կենտրոնական պաշտպան Սեզարը «կարմիր քարտ» ստացավ և հեռացվեց խաղադաշտից: 

Իսկ ահա «Նոան» շատ ավելի հաջողակ գտնվեց և մոտ է նախորդ տարիների եվրագավաթային հաջողությունները կրկնելուն: «Նոան» մոլդովական «Զիմբրուի» հետ դրսում 1-1 էր խաղացել, և տնային հանդիպումից առաջ լավ դիրքում էր: Պատասխան խաղում «Նոան» 2-1 հաշվով հաղթանակ տարավ ու անցավ Կոնֆերենցիաների լիգայի երրորդ փուլ: 

Հիշեցնենք, որ հայկական ակումբներից գործող չեմպիոն «Արարատ-Արմենիան» ևս շարունակում է պայքարը՝ Չեմպիոնների լիգայի մրցաշարում: