Քաղբանտարկյալ Արեգնազ Մանուկյանի մեղադրանքը կազմված է ենթադրությունների վրա․երեխայի հետ տեսակցության սահմանափակումն առավելապես վնասում է երեխային, պատժիչ և անմարդկային վերաբերմունքի մեխանիզմ է․ պաշտպան

«Մայր Հայաստան» կուսակցության վարչության անդամ Արեգնազ Մանուկյանի կալանավորման որոշման դեմ վերաքննիչ բողոքն առ այս պահը չի մակագրվել։ Առաջին ատյանի դատարանն ավելի քան մեկ շաբաթ է, ինչ գործի նյութերը չի ուղարկել Վերաքննիչ դատարան։ Այս մասին «Փաստինֆո»-ն տեղեկանում է փաստաբան Տաթևիկ Սողոյանից։

Հիշեցնենք, որ Արեգնազ Մանուկյանը ձերբակալվել, ապա կալանավորվել է Անդրանիկ Թևանյանին առնչվող վարույթի շրջանակներում։ Նրա նկատմամբ հարուցվել է հանրային քրեական հետապնդում՝ Քրեական օրենսգրքի 427-րդ հոդվածի 1-ին մասով (պետական գաղտնիք պարունակող տեղեկություններ հրապարակելը):
Պաշտպան Տաթևիկ Սողոյանը «Փաստինֆո»-ի հետ զրույցում մանրամասնեց՝ նշելով, որ բողոքով վիճարկվում է ինչպես հիմնավոր կասկածի, այնպես էլ՝ կալանավորման հիմքերի առկայությունը, պահանջում են բեկանել և մերժել կալանքի միջնորդությունը՝ հիմնավոր կասկածի բացակայությամբ; Մասնավորապես, պաշտպանության կողմը պնդում է, որ առկա չէ որևէ փաստական տվյալ, որ ենթադրյալ արարքը կատարվել է հենց Արեգնազ Մանուկյանի կողմից, մեղադրանքի ամբողջ էությունը կառուցված է միայն ենթադրությունների հիման վրա, ինչը բավարար չէ մեղադրանք առաջադրելու համար։ Ինչ վերաբերում է հիմքերին, ապա առաջին ատյանի դատարանը հավանական է համարել վարույթին խոչընդոտելու ռիսկը, պաշտպանի դիտարկմամբ՝ այդ հիմքը ևս առկա չի կարող լինել, թեև մանրամասներ չի կարող հայտնել։ Առավել մտահոգիչ է նաև այն հանգամանքը, որ առաջին ատյանի դատարանը սահմանափակել է Արեգնազ Մանուկյանի տեսակցությունները, այդ թվում՝ իր անչափահաս երեխայի հետ։

«Բոլոր իրավասու մարմիններին այդ մասին տեղեկացրել են։ Առաջին ատյանի դատարանը որոշում կայացնելիս շատ լավ տեղյակ է եղել անչափահաս երեխայի առկայության մասին և այդ առումով դատական ակտն ընդհանրապես չի պատճառաբանել, թե ինչու չպետք է շփվի երեխայի հետ։ Հարցն անձամբ տիկին Մանուկյանը բարձրաձայնել է ՄԻՊ աշխատակազմին, որի տարածած հաղորդագրությունից հայտնի է դառնում, որ Մարդու իրավունքների պաշտպանը ևս դիմել է իրավասու մարմիններին, ենթադրում եմ՝ դատախազությանը, որպեսզի վերանայեն խափանման միջոցի գոնե այդ հատվածը, որովհետև իրենց համար էլ է ակնհայտ, որ բնականաբար այդ սահմանափակումը ոչ այնքան վնասում է տիկին Մանուկյանին, որքան իր դստերը։ Այս պարագայում քրեական դատավարության գործիքակազմը դուրս է գալիս այդ խափանման տրամաբանությունից, ու դառնում է ոչ միայն պատժիչ մեխանիզմ, այլև՝ ինչ-որ առումով անմարդկային վերաբերմունքի մեխանիզմ այն մարդկանց հանդեպ, ովքեր առհասարակ այդ գործով որևէ դատավարական կարգավիճակ չունեն և գտնվում են խոցելի վիճակում, մասնավորապես անչափահաս երեխայի մասին է խոսքը»,- նշեց նա։

Հարցին՝ ի վերջո պարզվեց, թե ըստ մեղադրանքի ինչ ենթադրյալ գաղտնի տեղեկության մասին է խոսքը, արդյոք առկա է պետական գաղտնիք՝ Սողոյանը պատասխանեց ՝ նշելով, որ նման գործ չունեն՝ իրենց համոզմամբ, բայց այժմ զրկված են այդ մասին խոսելու հնարավորությունից, դա պաշտպանվում է պետական գաղտնիքով։ Ըստ մեղադրանքի՝ Արեգնազ Մանուկյանն իբրև փակ նիստից տեղեկություն է փոխանցել Անդրանիկ Թևանյանին, մինչդեռ, պաշտպանը նշում է, որ որևէ նման փաստ առկա չէ, ավելին, Մանուկյանն առհասարակ չգիտի՝ ինքն այդ նիստին ֆիզիկապես ներկա եղել է, թե ոչ։

«Նույնիսկ դա չի մտաբերում, ուր մնաց՝ ինքն ասի, որ ֆիքսել էր, թե ինչ-որ տեղեկություն գաղտնի է, առանձնացրել և փոխանցել է, մարդն ասում է՝ առհասարակ հարցականի տակ է՝ «Ես այդ խնդրո առարկա ինֆորմացիային, առհասարակ տիրապետել եմ, թե ոչ՝ ժամանակի այդ տարածության մեջ»։

Հեղինակ՝ Իզաբել Սահակյան