Մերցն ինչպես Մակրոնը․ Հայաստանի անկախության նշաձողի իջեցում

27 Հուլիս, 2026 19:22

«Մայր Հայաստան» կուսակցության նախագահ, քաղաքական բանտարկյալ Անդրանիկ Թևանյանի անդրադարձը՝ բանտից:
--
Գերմանիայի կանցլեր Մերցը, Ալիևի հետ հանդիպելուց և ռազմավարական բնույթի համաձայնության գալուց հետո, զանգահարել է ՀՀ վարչապետի պաշտոնը զբաղեցնող քաղաքացի Նիկոլ Փ․-ին։

Թեև հանդիպման և, առավել ևս, հեռախոսազրույցի բովանդակության մասին տեղեկատվությունն ամբողջական չէ, բայց հայտնի է, որ շոշափվել է հայ-ադրբեջանական, այսպես կոչված, խաղաղության գործընթացը։ Թե ինչ է սա նշանակում՝ կներկայացնեմ մեկ պարբերություն հետո։ Մինչ այդ՝ նախ Մերցի կերպարի մասին։

Գերմանիայի կանցլերն իր երկրի ներսում ունի շատ ցածր լեգիտիմություն։ Նա ԵՄ անդամ երկրների այն ղեկավարներից է, որը հանդիսանում է ՌԴ «գլոբալ պատերազմի» կուսակցության ներկայացուցիչ՝ չնայած այն հանգամանքին, որ պատերազմից տուժում է Գերմանիայի տնտեսությունը, և անկում է գրանցվում շարքային գերմանացու կենսամակարդակում։

Դատելով ամենից՝ Մերցն ու Ալիևը պայմանավորվածության են եկել վառելիքաէներգետիկ թեմայով։ Ալիևը, որպես այդ պայմանավորվածության կյանքի կոչմանը նպաստող գործոն, առաջ է քաշել Հայաստանի կողմից զիջումների գնալու հարցը։ Հենց այդ թեմայով էլ Մերցը խոսել է Նիկոլ Փ․-ի հետ։

Հիշեցնենք, որ Ալիևը հայ-ադրբեջանական «խաղաղության» գործընթացում մի շարք նախապայմաններ ունի, որոնց մի մասը հետևյալն է՝
ա) ՀՀ սահմանադրության փոփոխությունը և ՀՀ անկախության հռչակագրից փաստացի հրաժարումը,
բ) Ադրբեջանի պայմաններով սահմանագծման և սահմանազատման իրականացումը՝ ՀՀ-ի միակողմանի զիջումների տարբերակով,
գ) «Զանգեզուրի միջանցքի» արագ հանձնումը,
դ) ադրբեջանցիների բնակեցումը Հայաստանում։

Նիկոլ Փ․-ն այս և այլ նախապայմաններին համաձայնվել է, բայց ժամանակ է խնդրում իր դրսի հովանավորներից՝ ճիշտ այնպես, ինչպես 2018-ից հետո Ալիևից էր ժամանակ խնդրում՝ Արցախը հանձնելու համար։

Ժամանակը Նիկոլ Փ․-ին պետք է տնտեսաքաղաքական ամբողջատիրական համակարգ ձևավորելու համար։ Միայն դիմադրության բոլոր օջախները վերցնելուց հետո նա կարող է իրագործել հակահայկական պատվերները։
Մերցը հենց այդ ժամանակը սեղմելու նպատակով է խոսել Նիկոլ Փ․-ի հետ, քանզի առջևում ձմեռ է, և Ադրբեջանից եկող գազի կարիքն ունի Գերմանիան։

Մի խոսքով՝ Նիկոլ Փ․-ին վերընտրեցրած ԵՄ չինովնիկներն ու Ալիևը գալիս են իրենց աջակցության գնի հետևից՝ «պարտքը հատուցմամբ է գեղեցիկ» թեմայով։

Թե ինչպես է իրեն պահելու «խաղաղասեր» Նիկոլ Փ․-ն, դժվար չէ կռահել։ Նրանից պահանջում են Հայաստանի անկախության և անվտանգության նշաձողի իջեցում՝ ճիշտ այնպես, ինչպես 2022 թ. հոկտեմբերի 6-ից առաջ էին պահանջում Արցախի կարգավիճակի հետ կապված նշաձողի իջեցում (արդյունքում Արցախը հայաթափվեց)։

Տարբերությունն այն է, որ Արցախի հանձնման հովանավորը «գլոբալ պատերազմի» կուսակցության մեկ այլ ներկայացուցիչ՝ Ֆրանսիայի նախագահ Մակրոնն էր, իսկ հիմա Մակրոնին փոխարինում է Մերցը։

2-րդ տարբերությունն այն է, որ 2022 թ. Պրահայում Նիկոլ Փ․-ն ֆիզիկապես ներկա էր Արցախի հանձնման որոշմանը, իսկ հիմա նրան ընդամենը տեղյակ են պահում, թե Հայաստանի նշաձողի մասին ինչ են որոշել Ալիևի հետ։

Նիկոլ Փ․-ն այլ տարբերակ չունի, դրա համար էլ անում է այն, ինչ թելադրում են դրսից, քանի որ իր, Մերցի, Մակրոնի, Ալիևի, Էրդողանի հարաբերություններն ասիմետրիկ են։ Ալիևը, Էրդողանը, Մերցը, Մակրոնը և մյուսներն իրենց իշխանությամբ պարտական չեն Նիկոլ Փ․-ին։ Փոխարենը վերջինս գրեթե 100 տոկոսով պարտական է նշյալ գործիչներին՝ ՀՀ վարչապետի աթոռին մնալու համար։

Հայաստանի քաղաքական սուբյեկտները պետք է իրենց ադեկվատ պահեն ստեղծված իրավիճակում։

Աշխարհաքաղաքական բախումների զոհասեղանին Հայաստանն է»։

Անդրանիկ Թևանյան

«Երևան-Կենտրոն» ՔԿՀ

27.07.2026